Ishyirahamwe ry’umukino wa Basketball muri Uganda, FUFA, ryatangaje ko ikipe y’igihugu izwi nka The Silverbacks yari yarabuze ubushobozi bw’amafaranga ko irajya Benguela muri Angola mu ijonjora ryo gushaka itike y’igikombe cy’Isi yari yaravuze ko itacyitabiriye.
Tariki ya 23 Ugushyingo 2021 ni bwo FUBA yatangaje ko The Silverbacks itazitabira iri jonjora muri Angola bitewe n’uko nta mafaranga yabonye yo kuyifasha muri uru rugendo.
Yagize iti: “FUBA yamenyesheje Guverinoma ya Uganda binyuze mu kanama k’igihugu gashinzwe siporo ko nta mafaranga yo gufasha iyi kipe muri uru rugendo. Ikipe yari ikeneye amashilingi agera kuri miliyoni 380 kugira ngo ikore urugendo.”
Mu gitondo cy’uyu wa 25 Ugushyingo 2021, FUBA imaze gutangaza ko ikibazo cy’amafaranga Minisiteri ya Siporo yagikemuye, ikipe ikaba yagiye muri Angola mu rukerera.
Yagize iti: “Ishyirahamwe ry’umukino wa Basketball muri Uganda rirashimira Guverinoma ya Uganda binyuze muri Minisiteri ya siporo ku bwo kuba yaduhaye amafaranga ku gihe kugira ngo ikipe yitabire ijonjora.”
Iri jonjora rirabera muri Angola riratangira kuri uyu wa 26 rirangire ku wa 28 Ugushyingo 2021. The Silverbacks yahagurutse i Kampala saa cyenda z’urukerera rw’uyu wa 25. Ubu imaze kugera i Johannesburg muri Afurika y’Epfo, mu nzira yerekeza i Luanda.
