Inzego zishinzwe umutekano z’u Burundi mu ijoro ryo ku wa 4 rishyira uwa 5 Gicurasi 2021, zataye muri yombi abagabo batanu bari bafite imifuka yuzuye imyenda, hafi y’umupaka w’iki gihugu n’u Rwanda.
Urubuga SOS ruvuga ko aba bagabo bafatiwe mu gace ka Kiganga katagira nyirako (zone tampon) kegereye igiturage cya Rusaga 1, Komini Bugabira mu Ntara ya Kirundo, muri metero 300 ugana ku Kanyaru.
Abaturage bahamije amakuru y’ifatwa ry’aba bagabo, bagize ati: “Bafashwe n’inzego z’umutekano muri Kiganga, muri metero 300 ugana ku ruzi rw’Akanyaru rutandukanye u Burundi n’u Rwanda. Bari bafite imyenda bari bajyanye mu Rwanda.”
Nyuma yo gufatwa kw’aba bagabo, bivugwa ko abashinzwe umutekano bagiye gusaka mu rugo rw’abaturage babiri: Sylvestre Nsabintore na Samuel Nkurishaka, basangamo indi myenda.
Byitezwe ko abafashwe bazagezwa imbere y’ubutabera, bakaburanishwa ibyaha bijyanye n’ubucuruzi bwa magendu.
Kurikira ibiganiro n’amavidewo binyura kuri Bwiza TV
