Kuri uyu wa Kabiri, itariki ya 5 Nyakanga 2022, umusirikare wo mu ngabo z’igihugu cya Uganda (UPDF) yarashe bagenzi be babiri ahitwa Bulongo, mu Murenge wa Ruwenzori muri Teritwari ya Beni.
Nta gutanga ibisobanuro birambuye, Umuvugizi w’ibikorwa bihuriweho hagati y’ingabo za Repubulika ya Demokarasi ya Congo (FARDC) n’ingabo za Uganda (UPDF) yemeza ko ari umusirikare wa Uganda warashe atabishaka bagenzi be, barimo n’umusirikare wa FARDC.
Yongeyeho ko uyu musirikare wishe bagenzi be yamaze gutabwa muri yombi nk’uko iyi nkuru dukesha Mediacongo.net ivuga.
Lt. Col. Mak Hazukay, umuvugizi w’ibi bikorwa bihuriweho, yasezeranyije gutanga ibisobanuro birambuye kuri iki kibazo nyuma.
Abasirikari ba Uganda na Congo boherejwe mu turere twa Beni (Kivu y’Amajyaruguru) na Irumu (Ituri) mu bikorwa bihuriweho bigamije gukurikirana inyeshyamba za ADF zikorera muri Beni kuva mu myaka isaga 20 ishize.
