Perezida wa Leta Zunze Ubumwe za Amerika (USA), Joe Biden yatutse umunyamakuru wa Fox News witwa Peter Doocy kubera ikibazo yari amaze kumubariza mu kiganiro.
Iki kiganiro cyabereye mu ngoro y’Umukuru w’Igihugu (White House) kuri uyu wa 24 Mutarama 2022, nyuma y’ijambo ry’iminota 8 Biden yari amaze kuvuga.
Nyuma y’iri jambo, ibitangazamakuru bivuga ko abanyamakuru bihutiye kubaza Biden ibibazo bitandukanye, mbere y’uko basohorwa muri White House n’ababishinzwe.
Doocy yabajije Perezida Biden niba ntacyo bitwaye abaye amubabije ikibazo ku izamuka ry’ibiciro, maze amubaza ku ngaruka z’ubwiyongere bwaryo bwabayeho muri uyu mwaka.
Yagize ati: “None urakira ibibazo byerekeye izamuka ry’ibiciro? Uretekereza ku izamuka ry’ibiciro mu nshingano za politiki mbere y’igihe gito?”
Mu gihe uyu Mukuru w’Igihugu atari yamenye ko ‘micro’ yavugiragaho igifunguye, yagize ati: “Uwo ni umutungo ukomeye, izamuka ry’igiciro ryinshi. Mbega umuhungu w’imbwakazi w’ikigoryi!”
Fox News yatangaje ko nyuma yo gutuka Doocy, Biden yaje kumwihamagarira ubwe, amwihanganisha, anamushishikariza gukomeza kubaza ibibazo ku ngingo zitandukanye.
