Nyuma y’aho Urukiko Rukuru rwa Amerika, rusohoye ingingo y’uko abakuru b’igihugu cya Amerika bashobora kudakurikiranwa ku byaha bimwe na bimwe, Prezida wa Amerika Joe Biden yavuze ko iyo ngingo ishobora gutuma haba abategetsi birengangiza amategeko.
Prezida Joe Biden , yanenze iyo ngingo Urukiko ruherutse gushyira hanze kuri uyu wa Mbere, avuga ko itabanje gusuzumwa .
Iyo ngingo ijyanye n’amakuru y’ibyaha uwahoze ari perezida wa Amerika Donald Trump ashinjwa ko ashobora kuba yarakoze, byerekeye ku kwivanga mu bikorwa bijyanye n’amatora y’umukuru w’igihugu yo mu mwaka wa 2020.
Mu ijambo yavuze ubwo yari mu biro by’umukuru w’Igihugu ‘White House’ ku wa Mbere, Prezida Biden yagize ati “Nta n’umwe uri hejuru y’amategeko, naho yaba ari umukuru w’igihugu cya Amerika”
Biden yatangaje ko agiye gukomeza yubahiriza amategeko hamwe no kudakora ibirenze ububasha ahabwa nk’umukuru w’igihugu.
Yagize ati: “Umukuru w’igihugu uwo ari we wese hisunzwe iyo ngingo, harimwo na Donald Trump, ubu azaba afite ububasha bwo kutubahiriza amategeko.”
Urukiko rukimara gusohora iyi ngingo, byashimishije Donald Trump avuga ko kuri we ari intsinzi.
