Bill Gates, tajiri kutoka Marekani na mwanzilishi wa Gates Foundation, ametangaza mpango wa kuwekeza hadi dola bilioni 200 za Kimarekani kwenye miradi ya maendeleo endelevu barani Afrika. Tangazo hili alilitoa kwenye mkutano maalum wa Umoja wa Afrika uliofanyika katika makao makuu yake mjini Addis Ababa, katika jengo la Nelson Mandela Hall, akiwa mmoja wa watoa msaada wakuu wa bara hilo.
Katika hotuba yake, Gates alisema kuwa msaada huo utatolewa kwa kipindi cha miaka 20 ijayo, ukilenga zaidi kwenye afya ya jamii, maendeleo ya teknolojia, elimu bora, na miundombinu. Alieleza kuwa lengo ni kusaidia Afrika kujitegemea, kuondoa pengo la fursa, na kulinda maisha na ustawi wa watu wake, hasa vijana na wanawake.
“Huu si mpango wa huruma wala misaada ya dharura,” alisema Gates. “Ni dhamira ya kweli ya kushirikiana na Afrika katika safari yake ya kujitegemea. Afrika ina vijana wengi, wenye akili na bidii. Ni muhimu tuwaunge mkono kupitia elimu bora, huduma za afya na ajira.”
Gates aliongeza kuwa mradi huu utafanyika kwa ushirikiano na mataifa ya Afrika yatakayojitokeza kuonyesha utayari kupitia uongozi bora na ushirikiano wa karibu. Gates Foundation, mojawapo ya wafadhili wakubwa wa afya duniani, ilieleza kuwa mpango huu utaendelea kutegemea kazi zake za awali, lakini kwa upanuzi maalum kulingana na mahitaji ya Afrika.
Aliwataka viongozi wa Afrika kutambua fursa hii kama msingi wa mabadiliko ya kudumu, akisema:
“Hatutaki kuleta suluhisho kutoka nje na kulazimisha bara. Tunataka kusaidia Afrika kutafuta suluhisho zake, tukishirikiana na serikali, vijana, sekta binafsi na mashirika yasiyo ya kiserikali.”
Mkutano huo ulihudhuriwa na viongozi mbalimbali akiwemo Mwenyekiti wa Tume ya AU, Moussa Faki Mahamat, pamoja na mawaziri wa uchumi na maendeleo kutoka nchi wanachama. Dkt. Amani Abou-Zeid, Kamishna wa AU anayehusika na maendeleo ya kiuchumi, alisifu mpango huo na kusema kuwa ni hatua kubwa mbele, hasa wakati ambapo dunia inapambana na mabadiliko ya tabianchi, umasikini mkubwa, na ukosefu wa usawa wa fursa.
“Hii ni mwanzo wa mabadiliko makubwa. Sasa ni wakati wa kushirikiana na wadau kama Gates Foundation kutatua changamoto kwa kutumia uwezo wetu wenyewe,” alisema.
Inatarajiwa kuwa miradi mbalimbali nchini Rwanda itafaidika kupitia mashirika na taasisi zinazohusika na maendeleo na ushirikiano wa kimataifa.
Taarifa hii ilitangazwa rasmi Jumatatu kupitia tovuti ya Gates Foundation, ikieleza kuwa utekelezaji wa mpango huo utaanza mwishoni mwa mwaka 2025, kulingana na mazungumzo yanayoendelea na nchi zilizo tayari kushiriki.
