Amakuru aturuka muri Repubulika Iharanira Demokarasi ya Congo avuga ko Gen.Shemeki Shaban wari Komiseri ushinzwe ingabo muri CNRD/FLN yishwe.
Bitangazwa ko mu ijoro ryo ku wa Gatandatu rishyira iryo ku Cyumweru tariki ya 22 Ukuboza 2019, ahagana sa kumi za mugitondo, uyu Mujenerari wo muri FLN yaguye mu mutego w’umutwe udasanzwe w’ingabo za Congo (FARDC) uzwi ku nka HIBOU SPCIAL FORCE.
Ikinyamakuru Rwandatribune.com gitangaza ko habaye ukurasana igihe cy’amasaha atatu, Gen.Shemeki Shaban n’abo yari ayoboye 14 bahasiga ubuzima.
Iki kinyamakuru gitangaza ko iyi mirwano yabereye muri Teritwari ya Mwenga, Zone ya Bazile, Gurupoma ya Banamoca, hari hasize iminsi itanu Inyeshyamba za FLN zamenesherejwe muri Kalehe, igice kimwe gihungira muri aka gace muri gurupoma ya Bazile, kamilikili na kashombo.
Iki kinyamakuru gitangaza ko Jenerali Shemeki Shabani Dramas amazina ye y’ukuri ari Kagabo Patrick avuka mu cyahoze ari Perefegitura ya Kibuye, Komini Gishyita ubu ni mukarere ka Karongi, Intara y’uburengerazuba.
Yavutse muri 1976 yiga igisikari ESM muri 1990 muri promotion ya 32, yahunze 1994 ari kwiga muri Kaminuza y’u Rwanda i Butare mu ishami ry’ubuganga nk’umusilikare.
Urupfu rwa Gen Shemeki rwiyongereye ku rwa Jenerali Gaseni, Col Festus n’abandi ba ofisiye benshi hakiyongeraho n’itabwa muri yombi ry’uwari Umuvugizi wa FLN Capt.Nsengimana Herman n’abandi barwanyi.
