Kuri uyu wa Gatatu Kompanyi ya Akagera Business Group yari yagurishije imodoka ya Rayon Sports yayifatiriye nyuma y’uko iyi kipe inaniwe kwishyura amafaranga arenga miliyoni 36 z’amafaranga y’u Rwanda yari yasigayemo nk’umwenda wayo.
Iyi bisi ya Rayon Sports yo mu bwoko bwa Foton AUV, yari yayiguze akayabo k’agera kuri miliyoni 100 mu Ugushyingo 2018 ku ikubitiro ihita yishyura miliyoni 50 andi asigaye ubuyobozi bw’ikipe na kompanyi y’Akagera bagirana amasezerano y’uburyo azishyurwa nk’uko byari byatangajwe n’uwari Perezida wa Rayon Sports Paul Muvunyi yabitangaje.
Amakuru aravuga ko Rayon Sports itigeze yubahiriza amasezerano kuko kompanyi y’Akagera Business Group isanzwe icuruza imodoka ari nayo bayiguze yagiye yandikira Rayon Sports incuro nyinshi iyisaba kwishyura izi miliyoni 36 yari isigaje ariko birangra ikipe yanze kwishyura, akaba ariyo mpamvu kompanyi yafashe umwanzuro wo kuyifatira nk’uko Radio&TV10 yabitangaje.
Si ubwa mbere iyi modoka yaba ifatiriwe kuko no muri Kanama 2019 iyi kompanyi yari yayifatiriye ariko bikarangira Perezida Munyakazi Sadate wari uherutse gutorerwa kuyobora Rayon Sports yinjiye mu biganiro n’Ubuyobozi bwa kompanyi bukayirekura.
