Ibiro by’Umukuru w’Igihugu wa Botswana,Mokgweetsi Masisi kuri uyu wa 24 Gashyantare 2020 byamaganye ikinyamakuru Sunday Standard cyayise ‘indiri y’Abamafia b’Abashinwa n’Abarusiya’.
Itangazo riturutse muri ibi biro rivuga ko inkuru ‘Botswana a Chinese and Russian Mafia have’ ari uguharabika isura y’igihugu. Riramenyesha abaturage ko iyi nkuru igamije kubayobya kandi ishingiye ku makuru atagifite agaciro.
Iyi nkuru ya Sunday Standard yasohotse tariki ya 18 Gashyantare 2020, ivuga uburyo Botswana ari indiri y’abanyabyaha nk’imiryango irimo Russian Mafia na Chinese Triads, amakuru gishingira ku kigo cy’Abongereza gishinzwe gukora iperereza ku mutekano cyitwa ‘Intelligent Protection International Ltd’.
Iki kigo cyatangaje ko aya mabandi (mafia) akururwa n’umutungo kamere uri muri iki gihugu, ibikorwa bikorerwa mu mashyamba ndetse n’ubuhinzi bw’ibiyobyabwenge.
Ngo si Abarusiya n’Abashinwa gusa, kuko n’Abanya-Afurika y’Epfo, Zimbabwe na Zambia na bo baza muri iki gihugu, bagakora ibikorwa by’amabandi ngo gushimuta ba mukerarugendo. Ibi bikorwa byose ngo barabikora ariko leta ya Botswana ikabiceceka kubera ko aya mabandi aha ruswa abapolisi.
Aya makuru yasohowe na Intelligent Protection Int’l Ltd ni yo Perezidansi ya Botswana ivuga ko ashaje, kuko ngo iki kigo cyasohoye andi ayavuguruza.
Perezidansi ya Botswana yibutsa abaturage bayo igihugu cyabo cyimakaza ihame rya demukarasi ndetse no kubaha amategeko. Ku ngingo yo kwimakaza amahoro n’ibijyanye na yo, ivuga ko iki gihugu cyaje ku mwanya mwiza ku ruhande mpuzamahanga mu 2019, kuko yaje ku mwanya wa 30 ku isi no ku mwanya wa kabiri mu bihugu by’Afurika biri munsi y’ubutayu bwa Sahara.
