Igipolisi cya Brazil cyataye muri yombi abantu batatu nyuma yo kwicisha inkoni impunzi y’Umunyekongo, video igafatwa na camera y’umutekano kuri kiosk yegereye inkengero z’inyanja, bigatuma abantu bahaguruka n’umujinya basaba ubutabera ndetse bakanategura imyigaragambyo mu mijyi ikomeye.
Uyu Munyekongo, Moise Kabagambe w’imyaka 24, yakubiswe inkoni n’abagabo batatu bamuziritse mu cyumweru gishize nk’uko amashusho yashyizwe ahagaragara na polisi kuwa kabiri ushize abigaragaza, bimuviramo urupfu.
Abashinzwe iperereza barimo gusuzuma amakuru avuga ko Kabagambe yaba yarishwe azira kwishyuza amafaranga yari amaze iminsi ibiri akorera atanga ibyo kunywa muri iyo kiosk.
Kuri uwo wa Kabiri, nibwo igipolisi cyataye muri yombi abagabo batatu ndetse kikaba kiri gushakisha uwa kane.
Umukuru wa Polisi, Henrique Damasceno, yavuze ko nyiri iyi kisok yafashije mu kwerekana abagize uruhare muri uru rugomo atanga amashusho yafashwe na camera y’umutekano kandi atabigizemo uruhare.
Kabagambe yageze muri Brazil mu myaka 10 ishize nk’impunzi iturutse muri Repubulika ya Demokrasi ya Congo, kandi yari arimo kwiga ibijyanye n’ubwubatsi nk’uko umuryango we, ri nawo washishikarije imyigaragambyo yo gusaba ubutabera, wabitangaje.
Nyina w’uyu musore witwa Ivana nk’uko tubikesha Reuters, yabwiye abanyamakuru ko umuhungu we yakuriye muri Brazil. Ati “ Sinshobora kwizera ibyabaye,”
Ambasade ya Repubulika ya Demokarasi ya Congo na yo yasabye iperereza ryimbitse ku byabaye, ivuga ko ari Umunyekongo wa gatanu umaze kwicirwa muri Brazil muri ubu buryo kuva mu 2019.
Iki gihugu cyo ku mugabane wa Amerika y’Epfo bivugwa ko cyakiriye impunzi z’Abanyekongo 900 kuva mu 2016 kandi benshi batuye mu mijyi ya Rio de Janeiro na Sao Paulo nk’uko byemezwa na minisiteri y’ubutabera ari nayo ishinzwe urwego rushinzwe abinjira n’abasohoka.
