Abahinzi b’umuceri mu gishanga cya Rurambi mu karere ka Bugesera barataka igihombo gikabakaba miliyoni Magana abiri cyagaragajwe n’igenzura (audit)rimaze gukorwa incuro ebyiri. Ubuyobozi bwa koperative CORIMARU bwo buvuga ko audit yakozwe nabi, naho umugenzuzi akavuga ko iyo ikorwa nabi itaba yarakiriwe (reception) ngo n’uwayikoze abe yarishyuwe.
Tariki ya 29 ukwakira nibwo bwiza.com yasuraga abahinzi muri iki gishanga cya Rurambi kiri hagati y’akarere ka Bugesera n’aka Kicukiro, yahasanze abahinzi buzuye amagambo asobetse amaganya kubera intimba batewe n’igihombo cy’amafaranga akabakaba miliyoni 200. Nyuma bwiza.com igeze ku biro bya koperative corimaru, ihasanga umuyobozi wayo Mbonigaba Silas maze atera utwatsi ibivugwa n’abahinzi, ndetse ashimangira ko igenzura ryakozwe nabi.
Muri iki gitondo, bwiza.com ivuganye n’uwakoze igenzura, Kayonde Audace, maze ati, “ayo ni amatakirangoyi, keretse niba yaramaze guhimba izindi nyandiko zibigaragaza. Naho audit twarayikoranye, tuyimurikira inteko rusange n’umuyobozi (manager) ndetse na perezida bahari. Abavugwa guteza igihombo barisobanuye biba iby’ubusa, inteko rusange irayemeza, abayobozi badusinyira ko bayakiriye kandi banadusinyira sheke yo kutwishyura amafaranga yose. Iyo bitaba byo bari kutubwira tukayisubiramo, bakaba baretse kutwishyura”.
Iyi audit ivugwa yakozwe bwa mbere imurikwa tariki ya 30 nyakanga 2018, igaragaza bimwe mu bihombo, ariko abanyamuryango basaba ko hakorwa indi yimbitse. Ku ncuro ya kabiri, hongera kugaragazwa ibihombo, imurikwa tariki ya 17 Ukwakira 2018. Abavugwaho igihombo bahawe igihe cy’icyumweru ngo babe bamaze kugaruza amafaranga yose yanyerejwe.
Ku gicamunsi cyo kuri uyu wa mbere kandi, hagombaga kuba inama ihuje inzego zinyuranye zifite aho zihuriye n’iki kibazo, hari abakuriye amakoperative mu karere n’ihuriro ry’abahinzi b’umuceri. Mbonigaba Silas avuga ko ikigamije ari ukwerekana amakosa ari muri raporo y’igenzura.
Ejo tariki ya 31 Ukwakira 2018, hateganijwe indi nama y’inteko rusange ya Koperative CORIMARU ngo hafatwe imyanzuro iboneye kuri iki kibazo, nko gusaba abanyereje kugaruza amafaranga, kubahagarika mu nshingano bashinzwe cyangwa kubakurikirana mu butabera.
Dore bimwe mu byagaragajwe n’igenzura
1.Imodoka fuso yaguzwe ikabab itagaragaza umusaruro. Yaguzwe hatangwa amafranga asaga ibihumbi 25 ku muhinzi (umufuka w’umuceri ku bantu 1801). Imdoko yaguzwe miliyoni 30, iko imirimo myinshi ifasha abahinzi n’abatuye akarere ka bugesera muri rusange. Ariko ngo igenzura ryasanze kuri konti ifite amafaranga ibihumbi 200 gusa,
- Muri stock y’ibikoresho basanzemo igihombo cya miliyoni 18
- Mu ibaruramari nta bitabo bihari, n’ibihari ntibyuzurizwa ku gihe. Hahombyemo miliyoni 112
- Kopertative ifite ideni ry’abantu batari abanyamuryango ringana na miliyoni 151
- Uruganda MAYANGE RICE rwagurije koperative miliyoni 50, zifatwa abayobozi batagishije inama abahinzi, kandi bayatera imirwi hagati yabo, abanyamuryango batabizi
- Koperative ifitiye abashinzwe gutanga amazi, ideni ry’abashinzwe gutanga amazi ringana na miliyoni 50, kandi abahinzi bavuga ko bakatwa ibihumbi 19 kuri buri murima, kuri buri sizoni.
- Abahinzi basabwe amafaranga yo gutera inkunga ikigega AGACIRO n’umuryango FPR INKOTANYI ariko nta nyandiko zigaragaza ko yageze ku nzego yagenewe.
Ibi byose bivugwa muri raporo Mbonigaba Silas avuga ko ari “ibinyoma”. Avuga ko ibikorwa byose abayobozi bitorerwe n’abanyamuryango baba babizi.
