Kuva ku wa 6 Ukwakira 2019, abagera kuri 14 bo ku musozi wa Munyange, Komini ya Busiga, Intara ya Ngozi iherereye mu Majyaruguru y’u Burundi batawe muri yombi bashinjwa kwica umwe mu Imbonerakure.
Uko ari 14 bashinjwa kwica Imbonerakure yishwe ku wa 5 Ukwakira 2019, bose uko ari abagabo bafungiye muri kasho ya Polisi i Ngozi.
Amakuru agera kuri SOSMedias, avuga ko aba baturage bose bafashwe ari abo ku musozi umwe, uwo bashinjwa kwica ngo bakaba baramutsinze hafi y’iwe.
Aba bafashwe bakaba ari abo mu ishyaka CNL rya Agathon Rwasa, basanzwe bakimbirana n’Imbonerakure zibarizwa mu ishyaka CNDD-FDD riri ku butegetsi mu Burundi.
Imbonerakure yishwe ngo yavuye mu rugo nyuma yo kuvugana n’umuntu kuri telefoni wari umaze kumuhamagara, ngo akaba yari avuye mu rugo ababwiye ko agiye ku irondo ry’ijoro bahita bamutsinda hafi y’iwe.
