Ingabo z’u Burundi ziri mu bikorwa byo kubungabunga amahoro muri Somalia zirishyuza imishahara y’amezi atanu, aho bamwe muri aba ngo baheruka umushahara mu kwezi kwa munani mu mwaka ushize bagasaba minisiteri y’ingabo kubaha ibisobanuro kubera ko bagenzi babo baturutse mu bindi bihugu bahabwa umushahara wabo ku gihe.
Nk’uko abo basirikare babitangaza, ngo abayobozi babo babaha ibisobanuro bitandukanye kuri iryo cyererwa ry’umushahara bavuga ko rikabije, aho ngo bamwe bababwira ko umushahara wamaze kugezwa kuri konti ya minisiteri y’imari abandi bakavuga ibitandukanye.
Aba basirikare baragira bati: “Imiryango yacu iri mu bukene bukabije,irashonje kubera ko tutarakira umushahara kuva hafi mu mezi atanu.”
Aba basirikare nk’uko tubikesha kimwe mu binyamakuru by’i Burundi, ngo bakeka ko imishahara yabo ikoreshwa mu bucuruzi bwa lisansi bitewe n’ikibazo cy’igabanuka ry’amadevize cyugarije Guverinoma y’u Burundi.
Baragira bati: “Turakeka ko imishahara yacu ikoreshwa mu bucuruzi bwa lisansi kubera ko guverinoma y’u Burundi idafite amadevize ahagije ku batumiza iki gicuruzwa. Iyo ishobora kuba ari yo mpamvu yo gutinda kw’imishahara yacu.”
Abasirikare bugarijwe n’iki kibazo ngo akaba ari abo muri batayo ya 40, kugeza kuri batayo ya 43.
Usibye ubwo bukererwe bw’imishahara, ubuyobozi bw’ingabo z’u Burundi bwanafashe icyemezo cyo gukata amadolari hafi 700 buri kwezi kuri buri musirikare uri mu butumwa bwo kubungabunga amahoro muri Centrafrica (MINUSCA).
Aba basirikare nabo bakaba bavuga ko baheruka umushahara muri Gicurasi 2017 mu gihe abandi basirikare bava mu bindi bihugu babona umushahara wabo uko bikwiye. Aba bakavuga ko aho kugirango bahembwe ahubwo ubuyobozi bw’ingabo bukata amafaranga ku mushahara wabo mu gihe umushahara uteganywa na Loni ari amadolari 1,350 ku kwezi guverinoma ikaba ikuraho amadolari 662 .
Abasirikare bato muri aba bakaba bananenga ko abasirikare bakuru bo bakatwa amadolari 500 gusa bagasaba Loni gukurikirana iryo katwa ndetse ikibutsa Guverinoma y’u Burundi kubaha imishahara yabo y’amezi 10 ibarimo.
Kanda hano wiyandikishe ( Subscribe) ubona ibiganiro, indirimbo kandi bishya mu mashusho
