Impuzamashyaka CNARED, yagaragaje impungenge iterwa n’umubare munini w’abasirikare bahoze barwanira igihugu (EX FAB) mbere y’amasezerano yo muri 2005, bakomeje gutabwa muri yombi bamwe bakanicwa, ko ibyo ari ikimenyetso cy’uko hashobora kubaho ibara.
Nk’uko bigaragara ku rukuta rwa twitter rwa CNARED, bashyizeho urutonde rw’amafoto ya bamwe mu bishwe muri iyi minsi n’abandi bafashwe n’inzego z’umutekano mu cyumweru gishize ko ari ikimenyetso cy’uko mu gihugu hashobora kubamo intambara y’abaturage (guerre civile).
Bakomeje bagaragaza ko abasirikare (EX FAB) batabwa muri yombi bakanashyirwa ku ngoyi byaba na ngombwa bakicwa ngo ni abo mu bwoko bumwe bw’Abatutsi, ko ibi hari icyo bigaragaza.
Izi mpungenge zagaragajwe mu gihe hari hashize ukwezi kumwe Loni igaragaje ko nayo itewe impungenge n’ubwicanyi bukomeje gukorerwa ubwoko bumwe, ko bitutumbamo jenoside.
Ku wa 12 Kanama 2016, nibwo akanama ka Loni gashinzwe kurwanya iyicarubuzo kasabye Leta y’u Burundi gukora iperereza ku ihohoterwa n’ ubwicanyi bikorerwa abo mu bwoko bumwe.
Bagaragazaga ko iryo yicarubozo rikomeje gukorerwa abanyapolitiki batavuga rumwe na Perezida Nkurunziza bo mu bwoko bw’ Abatutsi by’ umwihariko rishingiye ku mpamvu za politiki nk’ uko byashimangiwe na Perezida w’ Aka kanama ka Loni, Jens Modvig.
N’ubwo amahanga yo ahangayikiye umutekano w’abaturage muri iki gihugu cy’u Burundi, Leta yo ivuga ko u Burundi bufite umutekano 99% ari naho bahereye barwanya igitekerezo cyo koherezayo abasirikare bo kugarura amahoro.
Kanda hano ujye ubona amakuru yihuse kandi kugihe kuri Facebook no kuri twitter
Itangishatse Theoneste/Bwiza.com
