Abantu bane mu Burundi bishwe n’abagizi ba nabi bataramenyekana bari bitwaje imbunda kandi bose bambaye imyambaro ya gisirikare. Ibi bikaba byarabaye mu ijoro ryo kuri uyu wa Gatandatu ushize muri Komini Mugamba, mu Ntara ya Bururi.
Abantu batatu baguye muri ubu bwicanyi bari bari mu kabari kari ku gasozi ka Nyatubuye, babiri muri bo bakaba bari abarwanashyaka b’ishyaka ririr ku butegetsi, CNDD-FDD, mu gihe undi yabarizwaga mu ihuriro Amizero y’Abarundi.
Umuntu wa kane yiciwe iwe mu rugo ahitwa Muyange-Kavumu ahagana saa moya n’igice z’ijoro. Abishwe ni : Jean Bosco Havugiyaremye, Léonidas Manirakiza, Edouard Nzambimana na Japhet Karibwami. Izindi ngo 2 ku musozi wa Gozi n’uwa mwumba zo muri komini imwe nazo zagabweho ibitero n’abantu bitwaje ibirwanisho. Urugo rumwe ngo rukaba ari urwa Naomé Kabura, Umuyobozi w’ishuri ribanza rya Mwumba, ndetse n’urw’uwitwa Bonaventure wigisha kuri lycée ya Komini Mwumba. Aha ariko nta muntu wahasize ubuzima nk’uko iyi nkuru dukesha Radio na televiziyo by’igihugu (RTNB) ivuga.
Tukiri ku kibazo cy’umutekano mucye mu Burundi, mu ijoro ryakeye kuri iki Cyumweru rishyira kuri uyu wa Mbere, igisasu cya grenade cyatewe mu marembo y’ahabera mess y’abapolisi b’u Burundi mu Ngagara muri karitsiye ya cyenda mu murwa mukuru, Bujumbura, abateye iyo grenade n’ibyo yangije bikaba bitaramenyekana nk’uko tubikesha urubuga ubmnews rwo mu Burundi.
Nyuma yo gutera iyo grenade ngo muri Komini Mutakura no muri Komini Cibitoke hahise hagaragara abapolisi benshi n’abasirikare bagaragaraga nk’abari bagabye igitero.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns.@bwiza.com
