Umunyapolitiki Manassé Nzobonimpa wigeze kuba Umunyamabanga Mukuru w’ishyaka CNDD-FDD riri ku butegetsi bw’u Burundi, yamaze guhunguka nyuma y’imyaka ikabakaba 11 ari mu buhungiro.
Nk’uko ikinyamakuru Ikiriho cyabitangaje, impamvu yatumye Nzobonimpa ahunguka, ni uko Leta y’u Burundi itigeze ikumira abana be mu gihe bashakaga kujya muri iki gihugu cyabo.
Nzobonimpa ukomoka mu Ntara ya Bubanza, uretse kuba umunyapolitiki, yanabaye umusirikare mu ngabo z’u Burundi, aho yari afite ipeti rya Colonel, anaba mu Nteko Ishinga Amategeko y’umuryango wa Afurika y’iburasirazuba, EAC.
Ubwo yahunganaga n’umuryango we mu mwaka w’2011, yari amaze gutangaza ku mugaragaro ko bamwe mu bakomeye muri CNDD-FDD bakora ibyaha bya ruswa, kwica n’ibindi byibasira ikiremwamuntu.
Byanavuzwe ko ubwo yari amaze guhunga, itsinda rya bamwe mu bakozi b’urwego rw’ubutasi batangiye kumushakisha kugira ngo bamute muri yombi, ubwo yari i Kampala muri Uganda arabacika.
Mu buhungiro [bivugwa ko yari muri Kenya], ni umwe mu bamaganye ukongera kwiyamamaza k’uwari Perezida w’u Burundi, Pierre Nkurunziza mu mwaka w’2015.
