Umuyoboke w’ishyaka CNL muri Komini Gihogazi, Intara ya Karusi yapfuye ku wa Mbere tariki ya 23 Nzeri 2019, nyuma y’inkoni yakubiswe n’urubyiruko rw’Imbonerakure, rubarizwa mu ishyaka riri ku butegetsi, CNDD-FDD.
Abaturage bo muri aka gace basaba ko ubutabera bwahagurukira izi Mbonerakure zidahwema kuburabuzanya n’abayoboke b’ishyaka CNL rirwanya Leta y’u Burundi, by’umwihariko rikaba irya Agathon Rwasa.
Amakuru atangazwa na RPA, avuga ko mu ijoro ryo ku Cyumweru tariki ya 22 Nzeri 2019, Imbonerakure zagiye mu rugo rw’uwitwa Jérémie Ntaconimariye ku musozi wa Gashikanwa, ngo zimusaba gusohoka mu nzu zimujyana ahantu zise ‘mu Ihaniro’, ngo zihanira abarwanya Leta.
Agejejwe mu Ihaniro, ngo Jérémie Ntaconimariye yakubiswe bunyamaswa agera aho agwa muri coma. Ku wa Mbere ahagana saa yine z’agasusuruko uyu muyoboke wa CNL ashiramo umwuka.
Mu gihe umuryango wa Ntaconimariye usaba ubutabera, ngo abayoboke ba CNL bararebana ay’ingwe n’Imbonerakure, hagamijwe umugambi wo kwihorera.
