Visi Perezida w’Inteko Nshingamategeko y’u Burundi, Agathon Rwasa aranengwa n’ishyaka riri ku butegetsi CNDD-FDD, nyuma yaho ashyigikiye igitekerezo cy’uko Leta iriho yavaho hakajyaho Leta y’inzibacyuho.
Mu nama yabereye i Arusha muri Tanzania ihuza Abarundi, uruhande rw’abarwanya Leta na Agathon aherereyemo rwasabye ko Leta ya Nkurunziza yavaho, hakajyaho iy’inzobacyuho, ibi iyi Leta iriho yahise ibitera utwatsi.
Mu kiganiro yagiranye n’abanyamakuru, Umunyamabanga mukuru w’ishyaka CNDD- FDD, Evariste Ndayishimiye, yanenze cyane Rwasa, ndetse anahamya ko ari igikoresho cy’Abazungu.
Yagize ati “Ntushobora kuba uri umudepite, uri muri Leta yagiyeho yatowe n’abenegihugu ngo uvuge ngo iyo Leta niveho hajyeho Leta y’inzibacyuho, ntari muri Leta ari mu badepite arivugira ibyo ashatse, mugabo ikintu Rwasa yerekanye neza, ni uko yerekanye ko akoreshwa atikoresha, si we ukora, arakoreshwa”.
Akomeza avuga ko Abakoloni bateje ibibazo u Burundi, ko mu gihe babona abarundi barakanuye amaso, batagikeneye ubuyobozi bwa mpatsibihugu, ko ari ko gushakisha abantu nka ba Agathon bakoresha nk’ibikoresho byabo.
Ati “Babonye ko Abarundi bakanuye, ko ejo hazaza habo bahafite mu biganza, aha rero niho bashaka babandi bakoresha, bamwe b’abagurano bakorera abazungu, bati genda wowe ukore uku n’uku, … akorera abandi”.
Mu biganiro bihuza Abarundi, ingingo ivuga ko Leta iriho yavaho hakajyaho iy’inzibacyuho hamwe no guha imbabazi impungwa zishinjwa gushaka guhirika ubutegetsi byageragejwe ku wa 13 Gicurasi 2015, kuzihurizaho byaranze mu gihe Leta ivuga ko bidashoboka.
Kanda hano ujye ubona amakuru yihuse kandi kugihe kuri Facebook no kuri twitter
Nsengiyumva Philippe/Bwiza.com
