Amacakubiri amaze iminsi avugwa mu ishyaka riri ku butegetsi mu Burundi, CNDD-FDD asa nk’arimo kugenda afata indi ntera, aho kuri ubu bivugwa ko abayobozi bamwe barimo minisitiri w’umutekano baba bafungishijwe ijisho bakekwaho kwifatanya n’abashatse guhirika ubutegetsi mu 2015.
Kuri ubu amakuru aravuga ko uyu minisitiri w’umutekano, Gen. Guillaume Bunyoni (bakunda kwita Mutama 2), yaba atarimo kurebana neza na Mutama 1 (uyu akaba ari Perezida Nkurunziza) nk’uko iyi nkuru dukesha UBMnews ikomeza ivuga.
Gen. Bunyoni akaba arimo gushinjwa gukorana n’abashatse guhirika ubutegetsi mu 2015, aho abaza ku isonga ari; Gen. Pontien Gaciyubwenge, wari minisitiri w’ingabo icyo gihe.
Undi ushyirwa mu majwi ni Godefroid Niyombare nawe bivugwa ko yaba arimo gukorana mu ibanga na Bunyoni, uyu (Niyombare) akaba ari we wari uyuboye igikorwa cyo kugerageza guhirika ubutegetsi bwa Nkurunziza mu 2015.
Amakuru atandukanye akaba avuga ko kuri ubu urugo rwa Gen. Bunyoni rucunzwe bikomeye ndetse kimwe n’abandi batavuzwe muri iyi nkuru bafungishijwe ijisho ndetse batemerewe gusohoka mu gihugu.
