Mu gihe mu Burundi hakomeje kuvugwa imvururu n’imyiryane, umuryango w’abibumbye ( ONU) watangaje ko abantu basaga 400 bamaze kwicwa abandi ibihumbi bakaba barahungiye mu bihugu bitandukanye.
Ubu bwicanyi bwatangiye bushinjwa abatavuga rumwe na Leta y’u Burundi, ariko kugeza ubu bukaba bushinjwa abashyigikiye Manda ya Gatatu y’umukuru w’igihugu Petero Nkurunziza.
Bamwe mu basirikare bakomeye barishwe abandi baburirwa irengero, muri abo hari abagera ku 9 bishwe bitunguranye ndetse bamwe bakaba bari mu nzego zifata ibyemezo.
1.Gen Brig. Athanase Kararuzi
Uyu yari mu gisirikare cya kera Ex- Fab, akaba aherutse kwicwa taliki 25 Mata 2016 ari kumwe n’umugore we n’umwana.
Yapfuye bivugwa ko Nkurunziza yateganyaga kuba yamugira Minisitiri w’umutekano.
2.Col.Bazubona Emmanuel
Uyu yahoze mu ishyaka ritavuga rumwe na Leta yishwe taliki 20 Mata 2016 ahagana samoya n’igice, aho yari yatezwe n’abantu ubwo yari atashye
3.Cap.Mugabonuwundi
Nawe yahoze mu gisirikare cya kera, akaba yarishwe taliki 7 Mata 2016 bamusanze i we murugo, akaba yari asanzwe ari umuganga mu bitaro bya Kamenge.
4.Maj. Didier Muhimpundu
Didier yari asanzwe ari icyegera cy’umuyobozi w’igice gishinzwe iby’ubuzima bw’abasirikare.
Akaba yarishwe taliki 22 Werurwe 2016, ubwo yahamagarwaga kuri Telefoni n’abantu batamenyekanye bagahita bamurasa.
5Lieutenant-colonel Darius Ikurakure
Yahoze ari umusirikare mu ishyaka rirwanya CNDD FDD ayoboye Batayo yitwa Genie Civil yo mu nkambi ya Muzinda, yishwe taliki 22 werurwe 2016 arashwe n’umuntu utaramenyekanye.
6.OPPI Anicet Dusabumuremyi Anicet nawe yahoze mu ishyaka rirwanya Nkurunziza, akaba yarishwe taliki 18 Mutarama 2016, ubwo yari ku muhanda wa 6 wo mu Bwiza.
7 Maj.Salvator Katihabwa Yishwe mu Gushyingo 2015,yicirwa mu kabari k’icyegera cy’umukuru wa Sena mu gace ka kibenga.
8.Col. Jean Bikomagu
Uyu musirikare yahoze ayoboye ibiro bikuru bya gisirikare, akaba yarishwe taliki 15 Kanama 2015, yicwa ageze imbere yo mu rugo i we atashye.
9.Lieutenant-Général Adolphe Nshimirimana
Adolphe yahoze mu basirikare ba Leta, akaba yari ashinzwe iperereza.
Yishwe taliki 2 Kanama 2015 yicirwa mu gace ka Kamenge ahagana mu masaha ya satatu z’amanywa.
Nkuko bikomeje kugaragara, kuva umwaka wa 2016 hamaze kwicwa abasirikare 6, by’umwihariko muri uku kwezi kwa Mata hakaba hamaze gupfamo 3 bo ku rwego rwo hejuru.
Aba ni abagiye bavugwa cyane ku bw’imirimo bari bashinzwe mu gihugu, kuva imvururu zatangira muri Mata 2015, bitangazwa ko hari abasirikare benshi bagiye bicwa mu bitero byagiye bihitana abo barindaga, ndetse ko ubu abagiye bafungwa nabo batagira ingano.
Kanda hano ujye ubona amakuru yihuse kandi kugihe kuri Facebook no kuri twitter
Ndacyayisenga Fred@Bwiza.com
