Iteka rya Perezida Nº 044/01 ryo ku wa 14/02/2020 rishyiraho sitati yihariye y’Ingabo z’u Rwanda (RDF), ni ryo rigena imidari y’ishimwe yambikwa ingabo z’u Rwanda.
Ni imidari 17 yambikwa abasirikare kubera imirimo y’indashyikirwa itandukanye baba bakoze.
1. Umudari w’Icyubahiro w’Ingabo
Ni umudari ufite ishusho y’igi rihagaritse, rifite impeta ebyiri zitandukanye. Inyuma h’iyo mpeta hariho amagambo “Rwanda Defence Force? na “Defence Order of Honour?; impeta y’imbere ikabaho ikirango cya RDF.
Umudari ufashwe n’urufatiro rwa zahabu rurimo inkota hagati, iri ku mwenda w’ubururu n’umweru.
Intare ishushanyije ku ibara ry’icyatsi kibisi n’ubururu bw’ikirere igaragaza Ingabo zirwanira ku Butaka; kagoma irimo iguruka ishushanyije ku ibara ry’ubururu bw’ikirere bigaragaza Ingabo zirwanira mu Kirere, mu gihe urusamagwe rusutamye inyuma y’intare na kagoma bishushanyije byombi mu ibara ry’icyatsi kibisi n’ubururu bw’ikirere bigaragaza Inkeragutabara.
Imbunda isobekeranye na misile bigaragaza ingufu z’Igihugu, mu gihe inkota igaragaza ubwitange mu kurinda Igihugu.
Ingano y’umudari ni 48 mm kuri 30 mm.
Ribbon bambaza uyu mudari igizwe ahanini n’ibara ry’ubururu bw’ikirere ririmo imirongo y’umweru ku mpande ebyiri n’akarongo gato k’umweru hagati.
Ibara ry’ubururu bw’ikirere rigaragaza ubugari bw’ibikorwa uwuhabwa yakoze mu gihe ibara ry’umweru rigaragaza ubuyobozi bufite icyerekezo.
-Ibigenderwaho kugira ngo utangwe:
Umudari w’Icyubahiro w’Ingabo ni wo mudari w’ikirenga utangwa mu Ngabo z’u Rwanda uhabwa umusirikare ukiri mu kazi cyangwa uri mu kiruhuko cy’izabukuru wakoreye igikorwa cy’indashyikirwa Igihugu, byemejwe n’ubuyobozi bubifitiye ububasha.
2. Umudari w’Ubutwari
Uyu mudari ufite ishusho y’inyenyeri ifite imitwe itanu yo mu ibara rya zahabu. Ufite uruziga ku ruhande rw’imbere rurimo umuheto gakondo n’imyambi ibiri isobekeranyije.
Ku ruhande rw’inyuma rw’umudari handitse amagambo “FOR BRAVERY?.
Umuheto gakondo n’imyambi ibiri isobekeranyije bigaragaza amateka y’imiterere y’intambara y’u Rwanda.
Ingano y’umudari ni 36 mm x 37 mm.
Ribbon bambaza uyu mudari ifite umukaba mugari w’ibara ry’umweru hagati, imikaba ibiri y’ibara ry’icyatsi cya gisirikare ku mpande ebyiri z’umukaba w’umweru, udukaba tubiri duto tw’ibara ry’umukara kuri buri ruhande rw’imikaba y’icyatsi cya gisirikare n’udukaba tubiri duto tw’ibara ry’umweru dukurikiwe n’imikaba itukura kuri buri ruhande rwa ribbon.
Ubwiganze bw’ibara ry’umutuku n’umweru bugaragaza ubwitange, intsinzi n’ubuzima birambye, mu gihe imikaba yibara ry’umukara igaragaza ko nta gitera ubwoba intwari.
-Ibigenderwaho kugira ngo utangwe:
Umudari w’Ubutwari uhabwa umusirikare wo mu Ngabo z’u Rwanda waranzwe n’ibikorwa by’ubutwari buhebuje, cyangwa ubwitange buhebuje aho rukomeye byashoboraga gutuma ahatakariza ubuzima, kandi akaba yaragaragaje ubutwari bwo mu rwego rwo hejuru.
2. Umudari wo Kubohora Igihugu : URUTI
Ni uruziga kandi ufite ibara rya zahabu. Igice cyawo cy’imbere kigizwe n’ikarita y’u Rwanda ruri mu minyururu n’ibiganza biri gushwanyaguza iyo minyururu. Handitseho amagambo “NATIONAL LIBERATION MEDAL? n’inyenyeri eshatu hasi.
Iminyururu ifashe ikarita y’u Rwanda igaragaza ibiganza by’igitugu no gukandamizwa n’ubuyobozi bw’u Rwanda bw’icyo gihe. Ibiganza bishwanyaguza iminyururu n’inyenyeri eshatu bihagarariye ukunga ubumwe kw’imbaraga zibohoza igihugu.
Umurambararo w’uyu umudari ni 36 mm.
Ribbon bambaza uyu mudari igizwe n’imikaba ibiri itukura ku mpera zayo ikurikiwe n’imikaba ibiri migari y’ibara ry’ubururu bw’ikirere n’umukaba w’ibara ry’icyatsi kibisi n’umuhondo hagati.
Ibara ry’umutuku rigaragaza ubwitange mu rugamba rwo kwibohora, mu gihe ibara ry’ubururu rigaragaza amahoro no guhuza bibukomokaho. Amabara y’icyatsi kibisi n’umuhondo ahagarariye icyerekezo n’icyizere by’ahazaza heza.
-Ibigenderwaho kugira ngo utangwe:
Umudari wo Kubohora Igihugu uhabwa umusirikare ukiri mu kazi cyangwa uri mu kiruhuko cy’izabukuru wagize uruhare mu rugamba rwo kubohora Igihugu hagati y’itariki ya 1 Ukwakira 1990 kugeza ku itariki 4 Nyakanga 1994.
Umudari wo Kubohora Igihugu: URUTI ushobora guhabwa umuntu utakiriho ukakirwa n’umwe mu bazungura be ku rwego rwa mbere.
4. Umudari wo Guhagarika Jenoside: UMURINZI
Ni uruziga rw’ibara rya zahabu ukagira kandi n’ikarita y’u Rwanda ku ruhande rw’imbere. Mu ikarita harimo icumu, inanjoro, umuhoro n’ubuhiri burimo imisumari, zari zimwe mu “ntwaro? zakoreshejwe muri Jenoside yakorewe Abatutsi.
Ibi byashwanyagujwe kandi bivunwa na bote ya gisirikare igaragaza imbaraga zahagaritse Jenoside yakorewe Abatutsi. Ku mudari handitseho amagambo “CAMPAIGN AGAINST GENOCIDE”.
Umurambararo y’umudari ni 36 mm.
Amabara y’imikaba yo hagati ya ribbon agaragaza ibendera ry’Igihugu n’imikaba ibiri itukura ku mpande za ribbon. Amabara y’ibendera ry’Igihugu agaragaza ko Jenoside yakorewe Abatutsi yahagaritswe n’Abanyarwanda. Ibara ry’umutuku rigaragaza ubwitange byakoranwe.
-Ibigenderwaho kugira ngo utangwe:
Umudari wo Guhagarika Jenoside: UMURINZI uhabwa umusirikare wari muri Rwanda Patriotic Army kugeza tariki ya 4 Nyakanga 1994 kandi wagize uruhare mu guhagarika Jenoside yakorewe Abatutsi.
5. Umudari w’Irahira rya Perezida
Ni umudari ufite ibara rya zahabu mu ishusho y’igi rihagaritse. Ku ruhande rw’imbere rw’umudari hashushanyije imisozi imeze nk’inyeganyega yakwaho n’izuba rirashe ikikijwe n’amashami abiri y’umunzenze.
Izuba rirashe rigaragaza icyizere cy’Igihugu, imisozi isa nk’inyeganyega igaragaza ubwiza bw’Igihugu, mu gihe amashami abiri y’umunzenze agaragaza ubusugire n’ubumwe bw’u Rwanda. Hejuru hawo handitseho amagambo y’Ikinyarwanda: “IRAHIRA RYA PEREZIDA WA REPUBULIKA”.
Ingano y’umudari ni 46 mm x 35 mm.
Ribbon yambazwa uyu mudari ifite agakaba k’ibara ry’umuhondo hagati, gakurikiwe mu mpande zombi n’udukaba tw’ibara ry’icyatsi kibisi, imikaba y’ibara ry’umweru, udukaba tw’ibara ry’ubururu, n’udukaba tw’ibara ry’icyatsi ku mpera zombi za ribbon.
Amabara y’ibendera ahagarariye Igihugu cy’u Rwanda mu gihe ibara ry’umweru risobanura ahazaza heza.
-Ibigenderwaho kugira ngo utangwe:
Umudari w’Irahira rya Perezida uhabwa umusikare wari mu Ngabo z’u Rwanda igihe cy’irahira rya Perezida wa Repubulika y’u Rwanda.
Umusirikare wari mu Ngabo z’u Rwanda mu gihe cy’irahira rya Perezida wa Repubulika inshuro zirenze imwe, ahabwa umudari we uriho ikimenyetso kigaragaza izo nshuro.
6. UMUDARI WO GUTABARIRA IGIHUGU HANZE YACYO (FCM)
Umudari wo Gutabarira Igihugu Hanze Yacyo ufite ishusho y’igi n’ibara rya zahabu. Ushushanyijemo inyenyeri y’imitwe itanu n’ibishushanyo by’abasirikare bari mu kazi bari kugenda.
Ahagana hasi h’umudari handitseho amagambo “FOREIGN CAMPAIGN MEDAL?. Inyenyeri y’imitwe itanu n’abasirikare babiri bafite imbunda bisobanura imbaraga zirenga imipaka zirinda ubusugire bw’Igihugu cyacu.
Umubare wometsweho ugaragaza inshuro umusirikare yatabariye Igihugu.
Ingano y’umudari ni 46 mm x 35 mm.
Ribbon yambazwa uyu mudari ifite, uhereye ibumoso, agakaba k’ibara ry’ubururu, gakurikiwe n’agakaba k’ibara ry’umukara, agakaba gato k’ibara ry’umuhondo, umukaba w’ibara ry’ubururu, agakaba k’ibara ry’umweru, agakaba gato k’ibara ry’ubururu, agakaba k’ibara ry’icyatsi kibisi, agakaba k’ibara ry’umweru, umukaba w’ibara ry’icyatsi kibisi, agakaba k’ibara ry’umuhondo, agakaba k’ibara ry’umukara, n’agakaba k’ibara ry’icyatsi kibisi ku mpera y’iburyo.
Ibara ry’ubururu rigaragaza ubwitange ku rugamba, umukara usobanura ibihe by’umwijima byatumye habaho gutabarira Igihugu, umweru usobanura amahoro arambye, umuhondo usobanura inkunga y’abaturage mu gihe cyo gutabarira Igihugu, naho icyatsi kigaragaza ko gutabarira Igihugu byageze ku iherezo.
-Ibigenderwaho kugira ngo utangwe:
Umudari wo Gutabarira Igihugu Hanze Yacyo uhabwa umusirikare wari mu Ngabo z’u Rwanda wagize uruhare mu ntsinzi cyangwa mu gikorwa cya nyuma mu rugamba rwo gutabarira Igihugu hanze yacyo.
Umusirikare wa RDF uhawe Umudari wo Gutabarira Igihugu Hanze Yacyo inshuro irenze imwe, ahabwa umudari uriho ikimenyetso kigaragaza umubare w’inshuro yatabariye Igihugu mu mahanga.
7. UMUDARI WO KUBUNGABUNGA AMAHORO (PMM)
Umudari wo kubungabunga Amahoro (PMM) ufite ishusho y’uruziga n’ibara rya zahabu. Uriho umubumbe w’Isi n’inuma ifashe ikibabi mu kanwa byose bikikijwe n’amashami abiri y’umunzenze. Inuma ifashe ikibabi mu kanwa bigaragaza amahoro naho amashami y’umunzenze akikije umubumbe w’isi agaragaza kubumbatira umutekano ku Isi.
Umudari wanditseho amagambo “PEACE MISSIONS MEDAL”.
Umurambararo w’umudari ni 36 mm.
Ribbon yambazwa uyu mudari ifite, uhereye hagati, agakaba k’ibara ry’umuhondo, gakikijwe n’agakaba k’ibara ry’ubururu ibumoso n’agakaba k’ibara ry’icyatsi kibisi iburyo, dukikijwe n’imikaba y’ibara ry’umweru mu mpera zombi za ribbon.
Ibara ry’umweru risobanura amahoro, ari yo ntego y’ubutumwa bw’amahoro, naho amabara y’ibendera ry’Igihugu ahagarariye u Rwanda.
-Ibigenderwaho kugira ngo utangwe
Umudari wo Kubungabunga Amahoro uhabwa umusirikare mu Ngabo z’u Rwanda wagize uruhare mu bikorwa byo kubungabunga amahoro.
8. UMUDARI W’AKAZI K’INDASHYIKIRWA MU NGABO (DDSM)
Umudari w’Akazi k’Indashyikirwa mu Ngabo ni uruziga kandi ufite ibara rya zahabu. Ku ruhande rw’imbere rw’umudari hariho urukomatane rw’ikarita y’u Rwanda, aho uwawuhawe akorera, ikirango cya RDF kigaragaza imbaraga, buri kimenyetso gishushanyije ku ikarita y’u Rwanda, n’ingabo ebyiri ku mpande zombi z’ikarita zisobanura Ingabo z’Igihugu. Ku ruhande rw’inyuma rw’umudari handitse amagambo “DEFENCE DISTINGUISHED SERVICE MEDAL”.
Umurambararo w’umudari ni 36 mm.
Ribbon yambazwa uyu mudari ifite agakaba k’ibara ry’ubururu gakikijwe mu mpande zombi n’udukaba tw’ibara ry’icyatsi kibisi, dukurikiwe n’imikaba y’ibara ry’umutuku wijimye.
Ibumoso, umukaba w’ibara ry’umutuku wijimye ukurikiwe n’agakaba k’ibara ry’umuhondo ukeye, gakurikiwe n’agakaba k’ibara ry’umutuku ukeye; naho iburyo, umukaba w’ibara ry’umutuku wijimye ukurikiwe n’agakaba k’ibara ry’umuhondo wijimye gakurikiwe n’agakaba k’ibara ry’umutuku wijimye.
Ibara ry’umutuku risobanura ukwitangira abandi, naho ibara ry’umuhondo rigasobanura ibyagezweho by’indashyikirwa by’abawuhawe. Amabara y’ubururu n’icyatsi kibisi agaragaza imiterere y’ahantu ibikorwa bya gisirikare bikorerwa.
-Ibigenderwaho kugira ngo utangwe:
Umudari w’Akazi k’Indashyikirwa mu Ngabo uhabwa ba Ofisiye Bakuru nk’abo mu Nama Nkuru y’Ubuyobozi bw’Ingabo bujuje ibi bikurikira:
1º kuba ari umuyobozi wa gisirikare ku rwego rufata ibyemezo ukiri mu kazi cyangwa wagiye mu kiruhuko cy’izabukuru;
2º kuba yaragaragaje ubuyobozi bufite icyerekezo igihe yari akiri mu mirimo ye;
3º kuba yaragaragaje imikorere y’indashyikirwa agira uruhare mu mutekano w’imbere mu Gihugu cyangwa mpuzamahanga cyangwa mu bikorwa by’ingabo ku rwego rwo hejuru.
9. UMUDARI W’IKIRENGA W’UBUYOBOZI BUKURU BW’INGABO BUKOMATANYIJE (JCSM)
Ni umudari ufite ishusho y’igi n’ibimenyetso bya buri cyiciro mu bigize Ingabo z’u Rwanda.
Ku ruhande rw’imbere rw’umudari hari Intare ishushanyije mu ibara ry’icyatsi kibisi isobanura Ingabo Zirwanira ku Butaka, kagoma iri kuguruka ishushanyije ku ibara ry’ubururu bw’ikirere isobanura Ingabo Zirwanira mu Kirere, naho urusamagwe rusutamye inyuma y’intare na kagoma byombi bishushanyije mu ibara ry’icyatsi kibisi n’ubururu bw’ikirere rusobanura Inkeragutabara.
Ku ruhande rw’inyuma rw’umudari handitse amagambo “JOINT COMMAND SUPERIOR MEDAL”.
Ingano y’umudari ni 46 mm x 35 mm.
Ribbon yambazwa uyu mudari ifite, uhereye ibumoso, umukaba w’ibara ry’icyatsi gikeye, ukurikiwe n’udukaba tw’ibara ry’umuhondo turimo hagati agakaba k’ibara ry’umukara, umukaba w’ibara ry’icyatsi cyijimye ugabanyijwemo hagati n’umukaba w’ibara ry’ubururu, udukaba tw’ibara ry’umuhondo turimo hagati agakaba k’ibara ry’umukara, dukurikiwe n’umukaba w’ibara ry’umutuku.
Ibara ry’umutuku risobanura ukwitangira abandi, ibara ry’umuhondo risobanura ibikorwa by’indashyikirwa by’uwuhawe, naho amabara y’icyatsi kibisi n’ubururu asobanura imiterere y’ahantu akazi gakorerwa.
-Ibigenderwaho kugira ngo utangwe:
Kugira ngo ahabwe Umudari Mukuru w’Ubuyobozi bw’Ingabo Bukomatanyije, umusirikare wo mu Ngabo z’u Rwanda agomba kuba yujuje ibisabwa bikurikira:
1 º kuba ari Ofisiye ukiri mu kazi cyangwa uri mu kiruhuko cy’izabukuru yarabaye indashyikirwa mu buyobozi bukuru bw’Ingabo no ku rwego rw’ubuyobozi bukuru bw’Ingabo bukomatanyije;
2 º kuba yararanzwe no guharanira no guteza imbere indangagaciro z’Ingabo z’u Rwanda zijyanye no kwihesha agaciro, gukunda Igihugu n’ubutwari mu gihe yari akiri mu mirimo ye.
10. UMUDARI W’AKAZI K’INDASHYIKIRWA K’INGABO ZIRWANIRA KU BUTAKA (ASSM)
Ni umudari ufite ishusho y’igi n’ibimenyetso by’Ingabo Zirwanira ku Butaka.
Ku ruhande rw’imbere rw’umudari hari intare n’intwaro z’Ingabo Zirwanira ku Butaka. Ibimenyetso bishushanyije mu ibara ry’icyatsi kibisi bigaragaza imiterere y’ahantu Ingabo Zirwanira ku Butaka zikorera. Uruhande rw’inyuma rw’umudari rufite ibara rya zahabu kandi rwanditseho amagambo “ARMY SUPERIOR SERVICE MEDAL”.
Ingano y’umudari ni 46 mm x 35 mm.
Ribbon yambazwa uyu mudari ifite umukaba w’ibara ry’umweru hagati, ukikijwe, kuri buri ruhande, n’imikaba y’ibara ryijimye, ikurikiwe n’udukaba tw’ibara ry’icunga, udukaba tw’ibara ry’ikijuju, udukaba tw’ibara ry’umutuku, n’udukaba tw’ibara ry’umukara mu mpera zombi za ribbon.
Amabara yijimye n’ikijuju bigaragaza ibikangisho Ingabo Zirwanira ku Butaka zishobora guhura na byo, naho umutuku n’umweru bikagaragaza ubwitange no gutsinda uwo bahanganye.
-Ibigenderwaho kugira ngo utangwe:
Kugira ngo ahabwe Umudari w’Akazi k’Indashyikirwa k’Ingabo Zirwanira ku Butaka, umusirikare agomba kuba yujuje ibisabwa bikurikira:
1º kuba ari ofisiye wabaye indashyikirwa mu buyobozi no mu buyobozi bukuru bw’Ingabo Zirwanira ku Butaka;
2º kuba yararanzwe no gukurikirana no guteza imbere indangagaciro z’Ingabo z’u Rwanda zijyanye no kwihesha agaciro, gukunda Igihugu n’ubutwari igihe yari akiri mu mirimo ye.
11. UMUDARI W’AKAZI K’INDASHYIKIRWA K’INGABO ZIRWANIRA MU KIRERE (AFSSM)
Umudari w’Akazi k’Indashyikirwa k’Ingabo Zirwanira mu Kirere ni umudari ufite ishusho y’uruziga n’ibimenyetso by’ingabo Zirwanira mu Kirere. Ku ruhande rw’imbere rw’umudari hari kagoma ifashe misile, iri kuguruka mu ibara ry’ubururu bw’ikirere bigaragaza imiterere y’ahantu ibikorwa by’Ingabo Zirwanira mu Kirere bikorerwa. Ku ruhande rw’inyuma rw’umudari hafite ibara rya zahabu kandi handitseho amagambo “AIR FORCE SUPERIOR SERVICE MEDAL’’.
Umurambararo w’umudari ni 36 mm.
Ribbon yambazwa uyu mudari ifite
umukaba w’bara ry’umweru hagati
ukikijwe, kuri buri ruhande, n’imikaba y’ibara ry’ubururu bwijimye, ikurikiwe n’udukaba tw’ibara ry’umuhondo, udukaba tw’ibara ry’umutuku, imikaba y’ibara ry’umuhondo usa na zahabu, n’udukaba tw’ibara ry’ikijuju mu mpera zombi za ribbon.
Amabara y’ubururu bwijimye agaragaza ibikangisho Ingabo Zirwanira mu Kirere zigomba guhangana na byo, naho amabara y’umutuku n’umweru akagaragaza ubwitange no gutsinda ibyo bikangisho.
-Ibigenderwaho kugira ngo utangwe:
Umudari w’Akazi k’Indashyikirwa k’Ingabo Zirwanira mu Kirere uhabwa Ofisiye wabaye indashyikirwa mu buyobozi no mu buyobozi bw’Ingabo Zirwanira mu Kirere kandi akaba yararanzwe no gukurikirana no guteza imbere indangagaciro z’Ingabo z’u Rwanda zijyanye no kwihesha agaciro, gukunda Igihugu n’ubutwari igihe yari akiri mu mirimo ye.
12. UMUDARI W’AKAZI K’INDASHYIKIRWA K’INKERAGUTABARA (RFSSM)
Ni umudari ufite ishusho y’igi n’ibimenyetso by’Inkeragutabara. Ku ruhande rw’imbere rw’umudari hari urusamagwe rusutamye inyuma y’intare na kagoma bishushanyije mu ibara ry’ubururu bukeye n’iry’icyatsi kibisi. Ku ruhande rw’inyuma rw’umudari handitse amagambo “SUPPORT IN DEFENCE”.
Ingano y’umudari ni 46 mm x 35 mm.
Ribbon yambazwa uyu mudari ifite agakaba k’ibara ry’umukara hagati gakikijwe, kuri buri ruhande, n’imikaba y’ibara ry’umweru, ikurikiwe n’udukaba tw’ibara ry’icunga, udukaba tw’ibara ry’umukara, udukaba tw’ibara ry’umutuku, udukaba tw’ibara ry’ubururu bwijimye, n’udukaba tw’ibara ry’ikijuju mu mpera zombi za ribbon.
Ubururu bwijimye n’ikijuju bigaragaza inkunga y’Ingabo zirwanira ku Butaka n’Izirwanira mu Kirere.
-Ibigenderwaho kugira ngo utangwe:
Uyu mudari uhabwa Ofisiye wabaye indashyikirwa mu buyobozi no mu buyobozi bw’Inkeragutabara kandi kuba yararanzwe no gukurikirana no guteza imbere indangagaciro z’Ingabo z’u Rwanda zijyanye no kwihesha agaciro, gukunda Igihugu n’ubutwari igihe yari akiri mu mirimo ye.
13. UMUDARI W’IKIRENGA W’UBUYOBOZI BW’INGABO N’ABAKOZI (CSSM)
Ukoze mu ishusho y’uruziga kandi ufite ibara rya feza ukaba uriho ibimenyetso bya buri cyiciro mu bigize Ingabo z’u Rwanda.
Ku ruhande rw’imbere rw’umudari hari intare ishushanyije mu ibara ry’icyatsi kibisi igaragaza Ingabo zirwanira ku Butaka, kagoma iri kuguruka ishushanyije mu bururu bw’ikirere bigaragaza Ingabo Zirwanira mu Kirere, naho urusamagwe rusutamye inyuma y’intare na kagoma bishushanyije mu ibara ry’icyatsi kibisi n’iry’ubururu bw’ikirere bigaragaza Inkeragutabara.
Ibimenyetso biri mu mabara yombi y’icyatsi kibisi n’ubururu bigaragaza aho ibyiciro bigize Ingabo z’u Rwanda byose bikorera. Ku ruhande rw’inyuma rw’umudari handitse amagambo “COMMAND AND STAFF SUPERIOR MEDAL”.
Umurambararo w’ umudari ni 36 mm.
Ribbon yambazwa uyu mudari ifite umukaba w’ibara ry’umweru hagati ukikijwe, kuri buri ruhande, n’udukaba tw’ibara ry’ubururu, dukurikiwe n’udukaba tw’ibara ry’icyatsi kibisi, n’udukaba tw’ibara ry’umukara mu mpera zombi za ribbon.
Ibara ry’umukara rigaragaza ibikangisho bihoraho, icyatsi kibisi n’ubururu bigaragaza Ingabo Zirwanira ku Butaka n’Izirwanira mu Kirere, zirwanya ibyo bikangisho, naho umweru ugaragaza intsinzi.
-Ibigenderwaho kugira ngo utangwe:
Uyu mudari uhabwa uwujuje ibisabwa birimo:
1 º kuba ari Ofisiye ukiri mu kazi;
2 º kuba ari umuyobozi w’ingabo cyangwa w’abakozi bunganira abayobozi b’ingabo mu rwego rukomatanyije ku Cyicaro Gikuru cy’Ingabo cyangwa mu mitwe y’ingabo kuva ku rwego rwa Burigade kuzamura, akaba yarakoze ibikorwa by’indashyikirwa mu kuzuza inshingano ze.
14. UMUDARI W’UBURAMBE MU KAZI N’IMYITWARIRE MYIZA (LSGCM)
Umudari w’Uburambe mu Kazi n’Imyitwarire ni umudari wa zahabu ufite ishusho y’uruziga n’inyenyeri eshatu zigerekeranye, inini muri zo ikaba ifite imitwe icumi isongoye. Iyo hagati ni inyenyeri ifite imitwe itanu naho into cyane ni inyenyeri y’imitwe itanu izengurutswe n’amashami abiri y’umunzenze.
Ku ruhande rw’imbere rw’umudari handitse amagambo ane ari yo “LONG, SERVICE, GOOD, CONDUCT.” Inyenyeri y’imitwe icumi igaragaza uburambe mu kazi.
Inyenyeri iringaniye n’into zigaragaza ugukomeza gutera imbere ku murimo k’uwuhawe.
Umurambararo w’umudari ni 35 mm.
Ribbon yambazwa uyu mudari ifite umukaba w’ibara ry’icyatsi kibisi cyijimye hagati ukikijwe, kuri buri ruhande, n’udukaba duto tw’ibara ry’umweru dukurikiwe n’udukaba duto tw’ibara ry’umutuku, imikaba y’ibara ry’icyatsi kibisi cyerurutse, n’udukaba tw’ibara ry’umukara mu mpera zombi za ribbon.
Umutuku ugaragaza ubwitange mu murimo, amabara y’icyatsi kibisi cyererutse n’icyijimye agaragaza uruhare rw’uwawuhawe mu byagezweho na RDF.
Amabara y’umukara n’umweru yo agaragaza umuhate mu gihe cy’akazi.
-Ibigenderwaho kugira ngo utangwe:
Umudari w’Uburambe mu Kazi n’Imyitwarire Myiza uhabwa:
1º ofisiye cyangwa suzofisiye mukuru wakoze neza umaze mu ngabo nibura imyaka makumyabiri (20), suzofisiye muto cyangwa umusirikare muto wakoze neza umaze mu ngabo nibura imyaka icumi (10);
2º ofisiye cyangwa suzofisiye mukuru wagaragaje ubunyamwuga bwo mu rwego rwo hejuru n’ikinyabupfura mu gihe runaka kirebwa.
15. UMUDARI W’IMYITWARIRE Y’INDASHYIKIRWA (DCM)
Umudari w’Imyitwarire y’Indashyikirwa (DCM) ufite ishusho y’inyenyeri ya zahabu y’imitwe irindwi. Ku ruhande rw’imbere rw’umudari hashushanyije abasirikare batatu n’umuyobozi wabo.
Abasirikare batatu bambaye ingofero zitwa “songa mbere” bahagarariye itsinda ry’abasirikare naho umusirikare wambaye ingofero y’uruziga ni umuyobozi wabo. Inyenyeri y’imitwe irindwi ihagarariye iminsi irindwi y’icyumweru bigaragaza akazi gahoraho.
Ku ruhande rw’inyuma rw’umudarihanditse amagambo “DISTINGUISHED CONDUCT MEDAL”.
Ingano y’umudari ni 42 mm x 43 mm.
Ribbon yambazwa uyu mudari ifite agakaba k’ibara ry’umweru hagati gakikijwe, kuri buri ruhande, n’udukaba tw’ibara ry’icyatsi kibisi dukurikiwe n’imikaba y’ibara ry’umuhondo wa zahabu, udukaba tw’ibara ry’ubururu bw’ikirere n’udukaba tw’ibara ry’umukara ku mpera zombi za ribbon.
Amabara y’icyatsi kibisi n’ubururu bw’ikirere asobanura Ingabo Zirwanira ku Butaka n’Izirwanira mu Kirere. Ibara ry’umuhondo wa zahabu risobanura ubudasa.
-Ibigenderwaho kugira ngo utangwe:
Umudari w’Imyitwarire y’Indashyikirwa uhabwa ofisiye wabaye intangarugero mu myitwarire myiza no mu migenzereze ye mu mwuga we, aba intangarugero kandi yitangira n’abandi ku buryo butagibwaho impaka.
16. UMUDARI W’AKAZI K’INDASHYIKIRWA (DSM)
DSM ifite ishusho y’inyenyeri ya feza y’imitwe irindwi. Ku ruhande rw’imbere rw’umudari hari ifoto y’umusirikare ufite imbunda. Inyenyeri y’imitwe irindwi ihagarariye iminsi irindwi y’icyumweru bigaragaza akazi gahoraho. Ku ruhande rw’inyuma rw’umudari handitse amagambo “DISTINGUISHED SERVICE MEDAL”.
Ingano y’umudari ni 42 mm x 43 mm.
Ribbon yambazwa uyu mudari ifite agakaba k’ibara ry’umweru hagati gakikijwe, kuri buri ruhande, n’imikaba y’ibara ry’icyatsi kibisi, ikurikiwe n’udukaba duto tw’ibara ry’ubururu bw’ikirere, n’udukaba tw’ibara ry’umuhondo wa zahabu ku mpera zombi za ribbon.
Amabara y’icyatsi kibisi n’ubururu bw’ikirere agaragaza Ingabo Zirwanira ku Butaka n’Izirwanira mu Kirere. Ibara ry’umuhondo wa zahabu risobanura ubudasa.
-Ibigenderwaho kugira ngo utangwe
Uhabwa
Suzofisiye mukuru cyangwa undi musirikare muto waranzwe n’ikinyabupfura n’imyitwarire by’intangarugero mu mirimo ye kandi ubunyamwuga bwe no kwitangira abandi kwe bikaba bitagibwaho impaka.
17. UMUDARI W’IMIKORERE Y’INTANGARUGERO (EPM)
EPM ni inyenyeri y’imitwe itanu y’ibara rya zahabu. Ku ruhande rw’imbere hari impeta ya zahabu ifite inyenyeri imwe itukura ikikijwe n’inyenyeri esheshatu za zahabu. Inyenyeri itukura igaragaza icyitegererezo cy’umusirikare abandi bareberaho. Izindi nyenyeri zigaragaza abo bakorana.
Ku mudari inyuma handitse amagambo “FOR EXEMPLARY PERFORMANCE”.
-Ibigenderwaho kugira ngo utangwe:
Umudari w’Imikorere Ntangarugero uhabwa:
1º umusirikare wo mu Ngabo z’u Rwanda wakoze mu buryo bw’intangarugero imirimo ye ya gisirikare;
2º umusirikare wo mu Ngabo z’u Rwanda wagaragaje igihe cyose ubwitange ku murimo, ubushake bwo gufata inshingano n’icyifuzo gihoraho cyo kuba indashyikirwa byiganwa n’abandi basirikare bo mu mutwe we.
