Abarwanyi b’umutwe w’iterabwoba ukorera mu ntara ya Cabo Delgado muri Mozambique kuri uyu wa 20 Ukuboza 2021 bagabye ibitero ku ngabo z’akarere ka Afurika y’amajyepfo, SADC, ziri mu butumwa bw’amahoro, bicamo imwe, bazitwara n’ibikoresho.
Nk’uko Umuvugizi w’izi ngabo, Brig. Gen. Andries Mahapa, yabimenyesheje itangazamakuru kuri uyu wa 21 Ukuboza 2021, ubwo izi ngabo zo muri Afurika y’Epfo ziri muri ubu butumwa zari zigeze mu gace ka Chai, zaguye mu mutego w’aba barwanyi, bararasana, zibasubiza inyuma.
Ubwo izi ngabo zari zitegereje kajugujugu, aba barwanyi ngo bongeye kuzitera, bicamo imwe. Gen. Mahapa yabisobanuye ati: “Muri uwo mwanya, umusirikare wacu yarashwe, ipfira aho ngaho.” Yongereyeho ko umurambo wayo wahise ujyanwa ku birindiro by’ingabo za SADC bya Chai.
Uyu musirikare aremeza ko hari ingabo za SADC zakomerekeye muri iki gitero, kandi hari n’ibikoresho byazo zatakaje. Gusa yavuze ko hagikorwa iperereza kugira ngo imibare imenyekane.
