Impuzamashyirahamwe y’Umupira w’Amaguru ku mugabane wa Afurika, CAF, yandikiye Ishyirahamwe ry’Umupira w’Amaguru mu gihugu cya Kenya ibamenyesha ko Umunya-BrĂ©sil Roberto Oliveira Concalves ‘Robertinho’ atemerewe gutoza imikino ya CAF Champions league Gor Mahia izahuriramo na APR FC.
Ku wa 27 Ugushyingo ni bwo APR FC izakira Gor Mahia i Nyamirambo mu ijonjora ry’ibanze rya CAF Champions league, bongere guhurira i Nairobi nyuma y’iminsi irindwi.
Mu ibaruwa Umunyamabanga wa CAF, Abdelmounaim Bah, yandikiye Umunyamabanga Mukuru wa KFF, yamumenyesheje ko umutoza Robertinho adafite uburenganzira bwo gutoza amarushanwa y’ama Club ategurwa na CAF, bijyanye no kuba adafite ibyangombwa bibimwemerera.
CAF ivuga ko umutoza Robertinho afite Licence B ya Brazil (ingana na Licence C ya CAF), mu gihe abatoza bemerewe gutoza ariya marushanwa mu mwaka w’imikino wa 2020/21 ari abafite byibura licence B na A.
CAF ivuga ko mu gihe umutoza Robertinho yabaya atoje iriya mikino, yazafatirwa ibihano bikomeye birimo no gukurwa mu marushanwa ya CAF ya 2020/21.
Robertinho utemerewe gutoza mu marushanwa ya CAF, yaherukaga gutoza Rayon Sports muri CAF Confederation Cup ya 2018, icyo gihe ayigeza muri 1/4 cy’irangiza cya ririya rushanwa.
