Abacancuro b’umutwe wa Wagner Group ukomoka mu Burusiya, bararegwa gutera ivuriro ryo muri Repubulika ya Centrafrica (CAR), bagafata ku ngufu umubyaza n’ababyeyi bari bamaze kubyara.
Ikinyamakuru Daily Beast kivuga ko amakuru cyakuye mu basirikare bakorera ku cyicaro gikuru cy’ingabo za CAR batifuje ko amazina yabo amenyekanya, yemeza ko abacancuro batatu bateye riri mu birindiro by’igisirikare bya Henri Izamo mu murwa mukuru mu ijoro rya tariki ya 10 Mata 2022.
Ngo muri uwo mwanya bari bafite imbunda za pisitoli n’inzoga za Whisky, maze bageze mu cyumba cy’ababyeyi, basangamo babiri bari bamaze kubyara, babereka mu marenga ko bashaka ko bakora imibonano mpuzabitsina.
Muri uwo mwanya, iki kinyamakuru kivuga ko umubyaza wari kumwe n’umwungirije yaje kubakumira, bose hamwe bashaka kubafata ku ngufu, ariko uyu mubyaza we abasha gutoroka, basigarana batatu babasambanya.
Ikinyamakuru HumAngle cyavuganye n’umujandarume wari urinze iri vuriro muri iri joro, maze agisobanurira ati: “Baje ku cyumweru tariki ya 10 Mata, saa saba z’ijoro, bakomereza mu cyumba cy’ababyeyi, ku bitanda hari ababyeyi babiri bari babyaye, hari umubyaza n’umwungirije.”
Yakomeje ati: “Batangiye gukorakora aba babyeyi bari ku gitanda, babasaba imibonano mpuzabitsina mu marenga. Ubwo bumvaga itegeko ry’umubyaza, baramuhindukiriye, bagerageza kumufata ku ngufu ariko arabacika, yirukira mu cyumba babyariramo maze ahamagara umuyobozi wari umujandarume.”
Uyu muyobozi ngo akimara kuhagera, abasaba kureka aba bagore, maze bacika banyuze mu idirishya babanje kurimena.
Umwe mu basirikare bakuru yabajijwe niba byashoboka ko aba bacancuro bakurikiranwa, yasubije ko Umukuru w’Igihugu, Faustin-Archange Touadéra wenyine ari we wagira icyo abikoraho.
Yagize ati: “Guhana umusirkare w’Umurusiya wakoze icyaha ntabwo igisirikare kibifitiye ubushobozi. Perezida wenyine ni we wafata icyemezo cy’uko Abarusiya bakurikiranwa.”
Raporo yashyizwe hanze n’impuguke z’Umuryango w’Abibumbye, yagaragaje ko abacancuro ba Wagner bakorera muri CAR ibyaha bitandukanye birimo ihohotera rishingiye ku gitsina n’ibindi bishingiye ku kutubahiriza uburenganzira bw’ikiremwamuntu, zisaba Leta guhagarika imikoranire na bo.
Gusa ubusabe bw’izi mpuguke ntacyo buratanga kuko Leta ya CAR ivuga ko idakorana n’abacancuro ba Wagner, igasobanura ko ahubwo ikorana n’ingabo z’u Burusiya zisanzwe zitoza izazo kugira ngo zibashe guhangana n’imitwe yitwaje intwaro ihungabanya umutekano w’igihugu.
