APR FC kuri uyu wa Gatandatu yaguye miswi igitego 1-1 na Gaadiidka FC, mu mukino ubanza w’ijonjora ry’ibanze rya CAF Champions league.
APR FC yari yakiriwe n’iriya kipe yo muri Somalia mu mukino wabereye kuri Kigali Pele Stadium i Nyamirambo.
Ni umukino iriya kipe y’Ingabo z’Igihugu iheruka kunyagirwa na Rayon Sports itigeze igira ibidasanzwe igaragazamo.
Igice cya mbere cy’umukino cyarangiye Gaadiidka FC iri imbere n’igitego 1-0 cyatsinzwe na myugariro Mohamed Hussein.
Ni ku mupira uyu myugariro w’iburyo yatereye kure, mbere yo kuruhukira mu izamu rya Pahvel Nzilha wari wataye izamu rye.
Nta kidasanzwe umutoza Thierry Froger n’abasore be bigeze bakora mu gice cya mbere cy’umukino.
APR FC yagomboye igitego yari yatsinzwe ku munota wa 47 w’umukino ibifashijwemo na Victor Mbaoma, ku mupira uyu rutahizamu w’umunya-Nigeria yari ahawe na Ombolenga Fitina.
Iminota yakurikiyeho yaranzwe n’igitutu cy’abakinnyi ba APR FC bashakaga igitego cya kabiri, gusa bananirwa kubyaza umusaruro uburyo buke bw’ibitego bagiye babona.
Nko mu minota ya nyuma y’umukino Niyibizi Ramadhan winjiye mu kibuga asimbura Bemol Apam Assongwe yabonye uburyo bubiri bwashoboraga kuvamo ibitego, gusa bwombi abuta hejuru y’izamu.
Mbere y’aho Ruboneka Jean Bosco wari winjiye mu kibuga asimbura Sharaf Eldin Shaibou yatsinze igitego, gusa biza kwemezwa ko yari yagitsinze yabanje kurarira.
Nyuma y’umukino abafana ba APR FC bumvikanye bavugiriza induru umutoza Thierry Froger bavuga ko “nta mutoza umurimo.”
Abafana b’iyi kipe y’Ingabo z’Igihugu kandi bumvikanye baririmba izina Adil [Mohammed Erradi] mu rwego rwo kugaragaza ko bakumbuye uyu munya-Maroc wahoze atoza APR FC.
Biteganyijwe ko APR FC izakina na Gaadiidka FC ku wa Kane w’icyumweru gitaha, mu mukino wo kwishyura nanone uzabera kuri Kigali Pele Stadium.
