Abakinnyi b’ikipe y’umupira w’amaguru ya Repubulika ya Demukarasi ya Congo ihabwa amahirwe yo kwegukana irushanwa rya CHAN, bakomeje kwandura icyorezo cya Covid-19.
Iki kibazo cyatangiye kugaragara muri iyi kipe ku Cyumweru tariki ya 17 Mutarama 2021, ubwo abakinnyi batanu bapimwaga, bikagaragara ko bamaze kwandura.
Aba ni: Djo Issama Mpeko, Mercey Ngimbi, Merveille Kikasa, Atibu Radjabu na Philippe Kinzumbi, bahise bajya mu kato kuri uwo munsi.
Kuri uyu wa Gatatu tariki ya 20 Mutarama 2021, byamenyekanye ko abandi bakinnyi bane barimo umuzamu Ley Matampi, Serge Mukumi Mulamba, Andy Bikoko na Doxa Gikanji, nabo banduye iki cyorezo, hiyongereyeho umutoza mukuru, Florent Ibenge.
Gusa amakuru aturuka mu bitangazamakuru bya RDC avuga ko aba bakinnyi batanu bagaragayeho iki cyorezo bwa mbere, bamaze gukira, aho bitabazwa ku mukino wa kabiri uhuza iyi kipe na Libya, kuri uyu wa 21 Mutarama 2021.
Ikipe ya RDC iri mu zihabwa amahirwe yo kwegukana iri rushanwa, cyane ko ari yo imaze kuryegukana inshuro nyinshi (ebyiri) kuva ryabaho mu 2007. Mu itsinda B iherereyemo, iri ku mwanya wa mbere n’amanota atatu ikomora ku mukino yatsinzemo Repubulika ya Congo.
