Rutahizamu w’umunya-Nigeria, Johnson Nwobodo Chidiebere arasaba ikipe ya APR FC kumwishyura umushahara w’amezi 10 angana n’umwaka w’imikino nyuma yo gusezererwa na iyi kipe.
Uyu mukinnyi w’imyaka 21 y’amavuko yasezerewe ku wa Mbere, tariki ya 27 Mutarama 2025 nyuma yo kumara amezi atandatu gusa muri APR FC, mu gihe yari yarasinye amasezerano y’imyaka ibiri mu mwaka ushize.
Nwobodo ntiyahiriwe n’igihe yamaze muri iyi kipe y’ingabo z’igihugu, aho yakinishwaga gake, akenshi akicazwa ku ntebe y’abasimbura.
APR FC iherutse gusinyisha abakinnyi babiri bo ku mpande bakomoka muri Uganda, ari bo Denis Omedi wakiniraga Kitara FC na Hakim Kiwanuaka wa SC Villa. Ibi byagaragaje ko iyi kipe itari gukomeza gukenera serivisi za Nwobodo, kimwe na mugenzi we Godwin Odibo, na we wavuye muri iyi kipe mu minsi ishize.
Amakuru aturuka muri Times Sport avuga ko Odibo yemeye kwishyurwa umushahara w’amezi atandatu nk’ingurane yo gusesa amasezerano ye. Ariko kuri Nwobodo, wahembwaga ibihumbi 4 by’amadolari ($4,000) ku kwezi, ntibarumvikana uko azishyurwa.
Nubwo yemeye gusesa amasezerano, Nwobodo aracyashimangira ko agomba kwishyurwa umushahara w’umwaka wose aho kwemera ay’amezi atandatu nk’uko APR FC ibimusaba.
Kugeza ubu, impande zombi ntiziragera ku mwanzuro wa nyuma, nubwo zose zamaze kwemeza ko amasezerano yarangiye ku mugaragaro.
Nwobodo yageze muri APR FC muri Nyakanga 2024 avuye muri Enugu Rangers yo muri Nigeria, asinya amasezerano y’imyaka ibiri.
