Nyuma y’urupfu rwa Col Buzobona Emmanuel hagiye habaho guterana amagambo hagati y’uruhande rushyigikiye Leta ndetse n’urundi ruyirwanya, bamwe bashinja abandi kumwirenza, Hussein Radjab wahoze ari umuyobozi wa CNDD FDD we ashinja Leta ya Nkurunziza kumwirenza ndetse ko bikekwa ko yazize kuba yakoranaga na Gen Niyombare.
Radjab avuga ko Col Buzobona Emmanuel yari umusirikare ushyira mu kuri, by’umwihariko ko yagiye ahabwa misiyo nyinshi z’ubwicanyi akazikwepa, ibyo bikaba biri mu byo yaba yazize.
Yagize ati: “ mu minsi yarafashwe ajyanwa mu biro by’iperereza, arabazwa, ashinjwa ngo akorana na Gen Niyombare, ngo akorana na ba Sindumuja, n’abandi twese twanze manda ya 3 ,…”.
Yakomeje avuga ko hari abantu benshi bagiye bamuvugira, biza kurangira arekuwe ariko ko yahigirwaga ko agomba kuvanwaho akwicwa nyuma yo kwanga gukorana n’abandi bakora ubwicanyi, birangira bishyizwe mu bikorwa aricwa.
ku mugoroba wo ku wa Gatatu tariki ya 20 Mata 2016, nibwo Col Buzobona Emmanuel yishwe n’abantu bataramenyekana, yicwa ageze iwe aho yatahaga i Bukirasazi muri Zone ya Kinama, umumotari wari umutwaye kuri moto nawe ahita abigenderamo.
Gen Niyombare bivugwa ko yakoranaga na Col Buzobona Emmanuel niwe wari uyoboye umugambi wo guhirika Nkurunziza ku butegetsi muri Gicurasi 2015, nyuma yo kunanirwa umugambi ubu akaba yarahunze.
Mu gihe Leta ya Nkurunziza ishinjwa kwirenza uyu musirikare wabo, yemeza aya makuru y’uko Col Buzobona Emmanuel yishwe n’abantu batazwi ariko ntiratangaza abo aribo.
Kanda hano ujye ubona amakuru yihuse kandi kugihe kuri Facebook no kuri twitter
Nsengiyumva Philipe/Bwiza.com
