Perezida w’inzibacyuho wa Burkina Faso, Lt Col. Paul Henri Sandaogo Damiba yirukanye Minisitiri w’ingabo, Brig. Gen. Aimé Barthélemy Simporé, yiyemeza kwikorera izi nshingano zombi.
Nk’uko France 24 ibivuga, itangazo ryaturutse mu biro bya Perezida Damiba ryatambutse kuri televizi y’igihugu kuri uyu wa 12 Nzeri 2022, ryagize riti: “Perezida yafashe inshingano ya Minisitiri w’ingabo n’abahoze mu ngabo.”
Col. Damiba yiyemeje gukora izi nshingano zombi mu gihe ibitero by’imitwe yitwaje intwaro yegamiye ku idini rya Isilamu bikomeje kwiyongera mu gihugu.
Ari ku butegetsi bwa Burkina Faso guhera muri Mutarama 2022 ubwo yakuragaho Christian Kaboré, amushinja kunanirwa inshingano nk’Umukuru w’Igihugu.
