Leta ya Iran yatangaje ko Colonel mu mutwe w’ingabo kabuhariwe zayo uzwi nka Quds, Hassan Sayyad Khodayari, yishwe n’abitwaje intwaro bataramenyekana bari kuri moto.
Khodayari yishwe arashwe amasasu atanu mu masaha y’umugoroba kuri uyu wa 22 Gicurasi 2022, ubwo yatahaga mu rugo rwe mu murwa mukuru, Tehran, nk’uko ikinyamakuru Al Jazeera kibivuga.
Leta ya Iran ivuga ko abishe Khodayari ari abanzi b’impinduramatwara, ndetse yemeza ko yatangiye iperereza kugira ngo bamenyekane, baryozwe icyaha.
Iyicwa rye rikurikiye iry’umuyobozi mukuru wa Quds, General Qassem Suleimani, wishwe n’ingabo za Leta Zunze Ubumwe za Amerika (USA) muri Mutarama 2020, zimushinja kugira umugambi mubi kuri iki gihugu.
Quds ni umutwe Iran yifashisha mu bikorwa bya gisirikare hanze yayo. Bamwe mu basirikare bayo bari muri Syria, aho bashyigikiye ubutegetsi bwaho burwanya n’umutwe w’iterabwoba wa Islamic State, ISIS.
