Colonel Flavian Mwangi Waweru wari umuyobozi ushinzwe imyitozo n’amahugurwa mu ngabo za Kenya zirwanira mu kirere (KAF), yabonetse mu modoka ye yari iparitse ku nzira yapfuye.
Ikinyamakuru The Star gisobanura ko uyu musirikare yavuye ku birindiro by’ingabo zirwanira mu kirere byitiriwe Moi biherereye mu gace ka Eastleigh i Nairobi, mu masaa cyenda y’umugoroba wo kuri uyu wa 26 Nzeri 2022.
Yavanwe kuri ibi birindiro n’imodoka ye ya Toyota Vitz, yerekeza mu mujyi, ariko ntiyagerayo. Abaturage basobanuye ko babonye iyi modoka imaze umwanya munini ku muhanda wa Juja, batabaza inzego zishinzwe umutekano.
Abapolisi ndetse n’abasirikare bahageze, basanga Col. Waweru yapfuye, bajyana umurambo we ku bitaro byemeje bidasubizwaho ko yashizemo umwuka.
Haracyakorwa iperereza kugira ngo hamenyekane impamvu y’urupfu rw’uyu musirikare ikiri amayobera.
