Ikipe y’Igihugu ya Côte d’Ivoire, Les éléphants, yatangiye neza Igikombe cya Afurika cya 2023 nyuma yo gutsinda Djurtus ya Guinée-Bissau ibitego 2-0.
Amakipe yombi yari yahuriye mu mukino ufungura CAN wabereye kuri Stade Alassane Ouattara d’à‰bimpé.
Byasabye umunota wa kane wonyine w’umukino ngo Seko Fofana ahagurutse imbaga y’abanya-Côte d’Ivoire babarirwa mu bihumbi 60 bari bagiye kureba uriya mukino.
Ni ku mupira uremereye uyu mukinnyi usanzwe akinira Al Nassr ya Cristiano Ronaldo yatereye inyuma gato y’urubuga rw’amahina, mbere y’uko uruhukira mu ncundura z’izamu ryari ririnzwe na Ouparine Djoco.
Ku munota wa munani Guinée-Bissau yashoboraga kwishyura iki gitego ubwo Fali Candé na Mauro Rodrigues binjiraga mu rubuga rw’amahina rwa Côte d’Ivoire, gusa bananirwa kumvikana ngo batereke umupira mu izamu.
Iyi kipe yongeye kubona ubundi buryo ubwo ku munota wa 29 w’umukino Mama Baldé yacengaguraga ba myugariro ba Les à‰léphants akinjira mu rubuga rw’amahina, gusa umupira woroheje yateye ufatwa n’umunyezamu Yahia Fofana.
Iminota 45 y’igice cya mbere yarangiye Côte d’Ivoire iri imbere n’igitego 1-0.
Iyi kipe yakabaye yabonye igitego cya kabiri ku munota wa 34 w’umukino, ubwo Seko Fofana yateraga irindi shoti rikomeye gusa umupira ukagarurwa n’umutambiko w’izamu.
Byasabye umunota wa 58 ngo iyi kipe y’umutoza Jean-Louis Gasset itsinde igitego cya kabiri biciye kuri Jean-Philippe Krasso.
Ni igitego uyu musore yatsinze nyuma yo kungukira ku makosa ya myugariro Opa Sangate wananiwe gukura umupira mu rubuga rw’amahina.
Gutsinda Guinée-Bissau byatumye Côte d’Ivoire iri mu makipe ahabwa amahirwe yo kwegukana Igikombe cya Afurika ihita iyobora itsinda rya mbere n’amanota atatu.
Ni mu gihe hagitegerejwe undi mukino wo muri ririya tsinda uri buhuze The Super Eagles ya Nigeria na Nzalang Nacional ya Guinée Equatoriale kuri iki cyumweru.
Si iri tsinda rikina gusa kuko na Les Pharaohs ya Misiri ikina na Os Mambas ya Mozambique mu mukino wo mu tsinda B, mu gihe Black Stars Ghana ikine na Cap-Vert.
