Icyorezo cya Covid-19 kirimo kuvuza ubuhuha mu nkambi z’impunzi n’ahandi zicumbitse muri Uganda aho HCR yemeza ko impunzi zisaga 2500 zimaze kwandura kongera n’abakozi b’imiryango yita kuri izo mpunzi.
Iyi mibare y’impunzi 2,500 y’impunzi zzimaze kwandura Covid-19 yavuye mu bipimo 29,000 by’abapimwe kuva icyorezo cyatangira kugaragara muri Uganda. Abagera ku 1892 ni bo bakize mu gihe 39 cyabahitanye.
HCR ivuga kandi ko abakozi b’imiryango ishinzwe gutabara impunzi bagera kuri 685 na bo banduriye mu kazi Covid-19. Inkambi ya Nakivale icumbikiye impunzi nyinshi ziva mu bihugu byo mu karere ni imwe mu zibasiwe cyane, aho yagaragayemo abantu 453 banduye.
Ibibazo bya Covid-19 biriyongeraho ingaruka za yo nk’inzara kubera imirimo yatungaga impunzi yahagaritswe, aho raporo ya HCR yo muri Kamena ivuga ko hari impunzi ziganjemo igitsinagore ziyahuye kubera inzara ndetse izindi zigakorerwa ihohoterwa rishingiye ku gitsina.
Iyi nkuru dukesha Ijwi rya Amerika ikomeza ivuga ko iyo raporo ivuga ko benshi muri izo mpunzi z’abagore zishoye mu bikorwa by’ubusambanyi, abandi bashyingira abana babo bakiri bato kugira ngo babone icyo kurya.
HCR ivuga ko umubare w’impunzi zimaze kwiyahura muri uyu mwaka kubera ingaruka z’icyorezo cya Covid uruta uw’iziyahuye mu gihe nk’iki umwaka ushize.
Ahandi havugwa impunzi zanduye Covid 19 ni mu murwa mukuru Kampala ahatuye impunzi zigera ku 60,000. Muri zo izigera ku 270 zanduye Covid 19 nk’uko bigaragazwa na raporo ya HCR.
Abantu basaga 92000 ni bo banduye COVID muri Uganda, kuri abo, hafi 76000 bamaze kuvurwa barakira. Iyo ndwara imaze guhitana 2500 nk’uko bivugwa na ministeri y’ubuzima muri Uganda.
Kurikira ibiganiro n’amavidewo binyura kuri Bwiza TV
