Valentine Nyiransengiyumva uzwi nka ‘Dore Imbogo’ na Dusabimana Emmanuel uzwi nka Lucky Fire, bakoze mu nganzo basohora indirimbo yamamaza Perezida Paul Kagame.
Dore Imbogo na Lucky Fire bombi bazwi mu ndirimbo zikunze gutembagaza abazumva.
Indirimbo bahuriyemo bayise ‘Oyeee’.
Iyi ndirimbo ikubiyemo ubutumwa bubwira Abanyarwanda ko nta wundi bagomba gutora mu matora y’Umukuru w’Igihugu ateganyijwe muri Nyakanga uyu mwaka utari “Intore Paul Kagame”.
Dore Imbogo asobanura Kagame nk’umuntu umenya indushyi n’imfubyi, mbere y’uko Lucky Fire yungamo ko ari ngombwa kumuhundagazaho amajwi.
Ati: “Amajwi yose tumuhurizeho, ndavuga intore izirusha intambwe, Kagame Paul umutoza w’ikirenga. Dutore umuyobozi wacu dukunda, reka ijabo riduheshe ijambo, hirya no hino diaspora, dutore umusaza du-celebra.”
Minisitiri w’Urubyiruko n’ibikorwa by’ubuhanzi, Dr Utumatwishima Jean Nepo Abdallah, yifashishije urubuga rwe rwa X yavuze ko yabonye iriya ndirimbo; ashima umurava wa Dore Imbogo na Lucky Fire cyo kimwe n’abandi bahanzi nka bo bakomeje gukora indirimbo z’amatora.
Minisitiri Utumatwishima yijeje kumenyekanisha indirimbo izahiga izindi mu bwiza.
