Komisiyo yigenga y’amatora muri Kenya (IEBC), yemeje Dr William Ruto nka Perezida mushya watorewe kuyobora iki gihugu, nyuma yo gutsinda mukeba we Raila Odinga bari bahanganye.
IEBC yatangaje ko Dr Ruto yatowe n’abangana na 7,176,141 bangana na 50.49% by’abatoye bose, mu gihe Odinga yatowe n’ababarirwa muri 6,942,930 bangana na 48.85%.
Mu gitondo cyo ku wa Kabiri tariki ya 09 Kanama ni bwo abanya-Kenya baramukiye mu matora y’Umukuru w’Igihugu.
Byemejwe ko Ruto ari we watowe nyuma y’iminsi itandatu abakozi ba IEBC bari mu gikorwa kitoroshye cyo kubarura amajwi.
Kuri uyu wa Mbere mbere y’uko ibyavuye mu matora bitangaza, ihuriro Azimio la Umoja rya Raila Odinga ryari ryanze ibiyavamo.
Odinga ntiyanigeze akandagira ahazwi nka Bomas igikorwa cyo gutangaza ibyavuye mu matora cyabereye.
Umuyobozi ukuriye abakurikiranira Odinga uburyo amatora yagenze n’uburyo amajwi abarurwa, Saitabao Ole Kanchory, yatangaje ko amajwi yibwe; asaba abakozi ba IEBC babigizemo uruhare gutabwa muri yombi.
Ati: “Dufite amakuru y’ubutasi yemeza ko sisitemu yinjiriwe, iribwa kandi bamwe mu bakozi ba IEBC bakoze ibyaha by’amatora, bamwe muri bo bakabaye batabwa muri yombi niba bataratabwa muri yombi.”
Uyu muyobozi yavuze ko ihuriro Azimio ryifuza kureba ibyavuye mu matora, rikabigenzura hanyuma rikabona gusaba Raila kujya muri Bomas kwitabira umuhango wo gutangaza uwatsinze aya matora.
Dr William Ruto yatorewe kuba Perezida wa gatanu wa Kenya asimbuye Uhuru Kenyatta yari amaze imyaka 10 yungirije.
Uyu mugabo nyuma yo gutora, yavuze ko iyo hataba Imana atari gutorerwa uriya mwanya ukomeye kurusha indi muri Kenya.
Yashimiye Odinga bari bahanganye ku kuba mu kwiyamamaza kwa bombi baratanze gahunda y’ibibazo byugarije abanya-Kenya bikwiye gukemurwa, yizeza ko yiteguye gufatanya na we cyo kimwe n’abandi bakandida bari bahatanye mu “kubaka igihugu kitagira umuntu n’umwe giheza.”
Dr Ruto kandi yashimiye Perezida Kenyatta bari bamaze imyaka 10 bakorana, n’ubwo mu matora yo mu cyumweru gishize yari ashyigikiye Odinga.
Yavuze ko yiteguye gukomereza ku byo Uhuru Kenyatta yubatse mu myaka 10 ishize, mu rwego rwo “guhuriza hamwe Kenya no kuyigeza ku rundi rwego”.
Ruto kandi yavuze ko abanya-Kenya bakwiye gufatana urunana kugira ngo bagere ku gihugu cyuje ubukire kandi kigendera kuri demukarasi.
2 Responses
Dr William Ruto ni we watorewe kuba Perezida wa Kenya
Kenya ibaye icitegererezo ca démocratie muri EAC!! Nta ishaka ryihariza ubutegetsi, umukandida ashigikiwe na perezida aratsindwa! Mbera vyiza ! EAC mwigire kuri kenya, ibuhugu biyoborwe n’abo abengihugu bihitiyemwo, bibananiye naho abenegihugu ntibongere kubatora!
Dr William Ruto ni we watorewe kuba Perezida wa Kenya
Kenya ibaye icitegererezo ca démocratie muri EAC!! Nta ishaka ryihariza ubutegetsi, umukandida ashigikiwe na perezida aratsindwa! Mbera vyiza ! EAC mwigire kuri kenya, ibuhugu biyoborwe n’abo abengihugu bihitiyemwo, bibananiye naho abenegihugu ntibongere kubatora!