Umuryango w’Ubumwe bw’u Burayi (E.U), ari nawo muterankunga mukuru wa guverinoma y’u Burundi, kuri uyu wa Mbere tariki 14 Werurwe wafashe icyemezo cyo guhagarika inkunga wateraga iki gihugu kuko ngo guverinoma y’u Burundi yananiwe kugira icyo ikora ku mpungenge zawo ku ihonyorwa ry’uburenganzira bwa muntu muri iki gihugu.
“Uko ibintu bimeze mu Burundi biracyahangayikishije bikomeye E.U… Icyemezo cy’uyu munsi kiragaragaza neza ko kugirango umubano wacu wongere gusubira mu buryo byuzuye twizeye ko hari ingamba zifatika ziri bufatwe” , uwo ni umuyobozi ushinzwe ububanyi n’amahanga muri E.U, Federica Mogherini mu itangazo ryashyizwe ahagaragara.
Iri tangazo ryemejwe na ba minisitiri b’ububanyi n’amahanga 28 bo muri E.U bari bateraniye mu nama I Buruseli, rikomeza rivuga ko mu gihe inkunga y’amafaranga yagenerwaga guverinoma ihagaritswe, E.U izakomeza gutter inkunga za sosiyete sivile n’indi miryango ishinzwe ibikorwa by’ubutabazi.
Iyi nkuru dukesha BBC ivuga ko gahunda y’inkunga E.U yagombaga jkugenera u Burundi kuva mu 2014-2020 ibarirwa muri miliyoni 430 z’Amayero kandi kugira igihinduka bizaba ikibazo kuri iki gihugu gisanzwe gikennye cyibasiwe n’ubugizi bwa nabi bwatangiye muri Mata 2015 perezida wacyo Pierre Nkurunziza amaze gutangaza ko aziyamamariza manda ya gatatu.
Federica Mogherini avuga ko kuri ubu guverinoma y’u Burundi yakagombye kubakira ku ngamba yemeranyije na Afurika Yunze Ubumwe, EAC n’Umuryango w’Abibumbye, ikaganira n’abatavuga rumwe nayo bagashakira umuti urambye ibibazo bya politiki biri muri iki gihugu.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
