Kuri uyu wa Kane, itariki 28 Mata, Guverinoma ya Ethiopia yahakanye ibivugwa mu itangazwa ryo kuva mu Ntara ya Afar kw’ingabo za TPLF.
Umuvugizi wa Guverinoma, Legesse Tulu, yatangarije itangazamakuru rya Leta ko amakuru avuga ko ingabo z’Abanya- Tigray zavuye muri Afar ari “ibinyoma bikomeye.”
Guverinoma yemeje ko ingabo zigometse zikiri no mu turere duturanye na Afar.
Ku wa Kane, Komiseri wa Polisi muri Afar, Ahmed Harif, aganira na Reuters, yavuze ko ingabo za TPLF zikiri mu turere tune duhana imbibi na Tigray nka Koneba, Abala, Berhale, ndetse na Magale, kandi ko zitahavuye kuva ku wa Mbere.
Getachew Reda, umuvugizi wa Tigray People Liberation Front (TPLF), ishyaka riyobora Tigray, ntabwo yashubije ibyifuzo byo kugira icyo atangaza. Ku wa Mbere ariko, yari yabwiye Reuters ko ingabo zabo zirimo kuva muri Afar.
Ingabo za TPLF zavuze ko zigomba kugenda kugira ngo imodoka z’ubutabazi zishobore kwinjira. Gusa imfashanyo nke ni yo yashoboye kugera mu Ntara ya Tigray yibasiwe cyane n’inzara, aho abaturage barenga 90% bakeneye infashanyo y’ibiribwa.
Umuryango w’Abibumbye washinje guverinoma n’imirwano kwitambika imodoka z’ubutabazi.
Ku ya 25 Werurwe guverinoma yari yatangaje ko imirwano ibaye ihagaritswe, kugirango imfashanyo zibashe kugera ku bantu.
Ingabo za TPLF na zo zemeye kubahiriza ihagarikwa ry’imirwano kugira ngo imfashanyo ihagije igere mu karere kabo “mu gihe gikwiye.”
Umuryango w’Abibumbye uvuga ko kuva aho imirwano ihagarikiwe, amakamyo 145 yageze muri Tigray, nk’uko Ishami ry’Umuryango w’Abibumbye rishinzwe Ibiribwa ribivuga ariko hakenewe nibura 100 ku munsi.
Ingabo za Tigray zirwana na Guverinoma nkuru guhera mu Gushyingo 2020, zishinja Minisitiri w’intebe Abiy Ahmed gushaka kwikubira ubutegetsi atitaye ku butegetsi bw’intara aho buri ntara igira guverinoma yayo.
