Igisirikare cya Ethiopia kishe abantu 42 bitwaje intwaro gishinja kugira uruhare mu bwicanyi bwahitanye abaturage basaga 100 mu karere ko mu burengerazuba ka Benishangul-Gumuz nk’uko bitangazwa na Televiziyo ya leta, FANA, kuri uyu wa Kane.
Kuwa Gatatu, komisiyo y’igihugu y’uburenganzira bwa muntu yatangaje ko abantu bitwaje intwaro bishe abantu basaga 100 mu gitero cyagabwe mu rukerera mu giturage cya Bekoji, muri Benishangul-Gumuz .
Televiziyo ya Fana, yatangaje ko abasirikare ba leta bafashe imiheto, imyambi n’izindi ntwaro zakoreshejwe muri ubwo bwicanyi.
Mu gitondo cyo kuri uyu wa Kane, Minisitiri w’Intebe wa Ethiopia, Abiy Ahmed, yari yatangaje ko ingabo za leta zoherejwe muri kariya karere gakunze kubamo amakimbirane ashingiye ku moko.
Ibiro Ntaramakuru bya Ethiopia, bivuga ko abayobozi bakuru ku rwego rw’ibanze batanu nabo batawe muri yombi kuri uyu wa Kane ku mpamvu zifitanye isano n’umutekano.
