Nyuma y’iraswa ry’umuhanzi Hachalu Hundessa, imyigaragambyo ishingiye ku moko isize ihitanye abagera 166 ndetse abandi benshi barakomereka nk’uko inzego z’umutekano muri Ethiopia zibivuga.
Umuhanzi Hachalu wari ufite imyaka 34 y’amavuko, yishwe arashwe ku wa Mbere w’icyumweru gishize nijoro, ubwo yari atwaye imodoka, biteza imyigaragambyo yahereye mu karere ka Oromia aho abenshi bari abafana be.
Polisi yo muri iki gihugu itangaza ko abasivile 145 n’abakora mu nzego z’umutekano 11 ari bo bapfiriye mu karere ka Oromia honyine n’aho abandi 10 biciwe mu murwa mukuru Addis-Abeba.
Hachalu yaririmbaga indirimbo zibandaga ku guharanira uburenganzira bw’abo mu bwoko bwa Oromo akomokamo, bukaba ari na bwo bwiganje muri Ethiopia. Indirimbo ze zarifashishijwe cyane mu myigaragambyo yagejeje ku kwegura k’uwahoze ari Minisitiri w’Intebe mu mwaka wa 2018, hashyirwaho Abiy Ahmed na we ukomoka muri ubu bwoko.
Mu itangazo ryashyizwe hanze na Girma Gelam, umuyobozi wa Polisi wungirije mu karere ka Oromia, yavuze ko abantu 167 bakomerekeye bikabije muri iyo myigaragambyo,abandi 1,084 batawe muri yombi, n’aho 166 barapfuye.
Minisitiri w’Intebe, Abiy Ahmed avuga ko abishe Hachalu ari abadashyigikiye amavugurura yifuza gukora. Yagize ati: “Dufite amahitamo abiri nk’abanya-Ethiopia; kugwa mu mutego w’abatatwifuriza ineza cyangwa kubererekera uwo mutego wabo tukaguma mu murongo w’amavugurura”. Ati: “Niduhitamo icya mbere kuzaba ari ukubafasha mu mugambi wabo wo kuturimbura”.
Ethiopia yaranzwe n’ubushyamirane bushingiye ku moko no ku myemerere y’amadini, biza gufata indi ntera nyuma y’urupfu rwa Hachalu Hundessa aho byinjiriwe n’inzangano za Politiki.
