Minisitiri w’Intebe wa Ethiopia, Abiy Ahmed, yatangaje ko yumvikanye n’umuyobozi wa Sudani gukemura mu mahoro amakimbirane ashingiye ku mupaka yateje imirwano hagati y’impande zombi.
Ibiganiro hagati y’abayobozi bombi bije bikurikira imirwano yabereye mu karere k’umupaka katavugwaho rumwe mu kwezi gushize aho Sudani yavuze ko ingabo za Ethiopia zafashe kandi zikica ingabo za Sudani, ikirego Addis Abeba yahakanye.
Kuri uyu wa kabiri, Minisitiri w’Intebe wa Ethiopia yahuye n’umuyobozi wa Sudani, Gen. Abdel Fattah al-Burhan, mu murwa mukuru wa Kenya, Nairobi, aho bari bahuriye mu nama ya IGAD, umuryango uhuza ibihugu umunani byo mu karere.
Kuri uyu wa Kabiri, Abiy yanditse kuri Twitter agira ati: “Twese twemeranyijwe ko ibihugu byacu byombi bifite ibintu byinshi byafatanyiriza hamwe mu mahoro.”
Ati: “Twese twiyemeje ibiganiro no gukemura mu mahoro ibibazo bihari”.
Burhan yavuze ko inama ya IGAD yabahaye amahirwe “yo gusuzuma igisubizo” ku bibazo biri mu karere, ariko ntiyabisobanura.
Ati: “Twishimiye guterana mu gihe gito cyane kugira ngo tuganire ku bibazo by’ingenzi”.
Akanama kayoboye igihugu cya Sudani kavuze gusa ko habaye “inama yo mu muhezo” hagati ya al-Burhan na Abiy.
Impaka zimaze igihe zishingiye ku karere ko ku mupaka uhuza ibihugu byombi karumbuka cyane, al-Fashaqa, zatumye amakimbirane yiyongera hagati y’ibihugu mu myaka yashize, rimwe na rimwe hakaba gukozanyaho hagati y’ingabo zabyo.
Ubusanzwe al-Fashaqa, iri mu mbibi mpuzamahanga za Sudani ariko yakunze guhingwamo n’abahinzi bo muri Ethiopia mu myaka ibarirwa muri za mirongo.
