Mu gitondo cyo kuri uyu wa Gatandatu, Igisirikare cya Israel cyatangaje ko cyabonye drone ya Iran yohererejwe muri Syria mu kirere cya Israel, mu gusubiza kigatera ibirindiro bya Iran biri muri Syria ariko imwe mu ndege zacyo ikaba yarashwe.
Ku nshuro ya kabiri mu gitondo cyo kuri uyu wa Gatandatu, ngo urusaku rw’amabombe ya rockets rukaba rwumvikanye mu majyaruguru ya Israel, nyuma yaho gato Televiziyo ya Syria igatangaza ko muri Damascus hari guterwa bombe ivuga ko ari ubushotoranyi bushya bwa Israel.
Nk’uko Igisirikare cya Israel gikomeza kivuga, ngo missiles ziraswa indege za Syria zarashe indege y’intambara ya Israel yo mu bwoko bwa F-16, biba ngombwa ko abapilote basimbuka bakayivamo indege ikagwa mu majyaruguru ya Israel. Aba bapilote bakaba bahise bajyanwa mu bitaro.
Kuva ibibazo byatangira, Minisitiri w’Intebe wa Israel Benjamin Netanyahu arimo aragisha inama mu by’umutekano ari nako yemeza igikwiye gukorwa mu gihe cya nyacyo. Abagize inama y’umutekano ya Israel nabo bakaba bari guhabwa amakuru umunota ku munota.
Umuvugizi w’Igisirikare cya Israel, Brig. Gen. Ronen Manelis yagize ati: “Twabonye drone y’inya-Iran UAV yahagurukiye ku butaka bwa Syria. Drone yabonwe na systems z’igisirikare cyo mu kirere cya Israel(IAF), maze ihanurwa na kajugujugu ya IAF. Drone ya Iran yaguye ku butaka bwacu turayifite”.
Ku rundi ruhande ariko, Televiziyo ya Syria yo mu gitondo cyo kuri uyu wa Gatandatu yatangaje ko uburyo bw’ubwirinzi bwa Syria bwahanuye indege zirenze imwe za Israel.
Bitewe no kurasa kw’izi ntwaro zirasa indege za Syria, nk’uko iyi nkuru dukesha ikinyamakuru Haaretz cyo muri Israel ikomeza ivuga, ngo urusaku rwumvikanye mu majyaruguru ya Israel mu mujyi witwa Beit She’an, nyuma rwumvikana mu bice byegereye bihakikije no muri Golan Heights.
Ibi bikaba byabaye mu gihe muri Syria n’ubundi igisirikare cya leta gikomeje guhangana n’inyeshyamba mu rufaya rwinshi rw’amasasu.
Kanda hano wiyandikishe ( Subscribe) ubona ibiganiro, indirimbo kandi bishya mu mashusho
