FIFA yategetse ko Luc Eymael watoje Rayon Sports yishyurwa arenga Frw miliyoni 152

Impuzamashyirahamwe y’Umupira w’amaguru ku Isi (FIFA), yategetse ikipe ya Young Africans yo muri Tanzania kwishyura Umubiligi Luc Eymael wahoze ari umutoza abarirwa muri $152,000 (arenga Frw miliyoni 152) kubera kumwirukana mu buryo butemewe n’amategeko.

Luc yageze mu Rwanda muri 2014 aje gusimbura Umufaransa Didier Gomez da Rosa wari umaze kwerekeza muri Coton Sports de Garoua yo muri Caméroun, atandukana na yo amaze kuyitoza imikino 14 irimo umwe yatsinzwe ndetse n’undi umwe yanganyije.

Yahagaritswe n’Ishyirahamwe ry’umupira w’amaguru mu Rwanda (FERWAFA) imikino 8 n’ihazabu ry’ibihumbi 200 kubera uruhare yagize mu mvururu zakurikiye umukino Rayon Sports yatsindiwemo na AS Kigali kuri Stade Amahoro i Remera.

Muri Nyakanga 2020 ni bwo ikipe ya Young Africans yirukanye umutoza Luc Eymael wari uyimazemo igihe gito ndetse inamutegeka kuva ku butaka bwa Tanzania vuba na bwangu, nyuma y’amagambo y’irondaruhu yari yatangaje ku bafana bayo.

Ubwo Young Africans yari imaze gukina na Lipui FC mu mukino w’umunsi wa nyuma wa shampiyona ya Tanzania warangiye itsinzwe igitego 1-0, umutoza Luc Eymael yumvikanye yita abaturage ba Tanzania ‘injiji’ na ho abafana ba Young Africans abita ‘imbwa n’inkende’ zirirwa zisakuza.

Ni amagambo yababaje cyane ubuyobozi bwa Young Africans buhita bumwirukana nyuma yo gusesa amasezerano ye.

Uyu Mubiligi cyakora cyo yaje gutanga ikirego muri FIFA avuga ko iriya kipe ikunzwe kurusha izindi muri Tanzania yamwirukanye mu buryo bunyuranyije n’amategeko.

Ni ikirego ruriya rwego ruyobora umupira w’amaguru ku Isi rwaje guha agaciro; rutegeka Young Africans kumwishyura $152,000. Yanga yahawe iminsi 45 yo kuba yamaze kwishyura uriya mutoza, bitaba ibyo igafatirwa ibihano bikomeye.