Ishuri Rikuru rya Gisirikare ry’u Rwanda ku bufatanye na Kaminuza y’u Rwanda, bateguye inama nyunguranabitekerezo y’umunsi umwe ku mutekano w’igihugu yabereye mu Ishuri rya Gisirikare ry’u Rwanda i Gako.
Iyo nama yitabiriwe n’abayobozi bakuru muri Guverinoma barimo Minisitiri w’Ububanyi n’Amahanga n’Ubutwererane, Olivier Nduhungirehe, Minisitiri w’Ingabo, Juvenal Marizamunda, ndetse n’abayobozi bakuru mu nzego z’umutekano.
Yahuje abasirikare, abafata ibyemezo bya politiki, abanyeshuri n’abashakashatsi, hamwe n’inzobere mu by’umutekano kugira ngo baganire ku bibazo by’umutekano Afurika ihanganye na byo muri iki gihe.
Mu ijambo ryafunguye iyo nama, Minisitiri w’Ububanyi n’Amahanga n’Ubutwererane, Olivier Nduhungirehe, yashimangiye ko ahazaza ha Afurika hagomba kugenwa n’Abanyafurika ubwabo.
Yagize ati: “Kwivanga kw’amahanga, haba mu bya politiki, ubukungu cyangwa igisirikare, kenshi kwagiye kudindiza iterambere rusange ryacu,” asaba ibihugu bya Afurika kugira uruhare rukomeye mu kwishakira ibisubizo by’umutekano wabyo.
Mu biganiro byabaye, abitabiriye inama basabye ko Afurika yashyira imbere ibisubizo biyobowe n’Abanyafurika mu gukemura ikibazo cy’umutekano muke, bagaragaza ko kwivanga kw’amahanga n’imiyoborere idahagaze neza bikomeje guhungabanya ituze ku mugabane.
Iyo nama yanagarutse ku ruhare rw’umutungo kamere wa Afurika, hagaragazwa ko ushobora guteza imbere iterambere rirambye igihe ucunzwe mu mucyo no mu buryo buboneye.
Abatanze ibiganiro bagaragaje ko ingaruka z’inyungu z’amahanga zitakigarukira gusa ku kwivanga mu bya gisirikare na politiki, ahubwo zirimo n’igitutu cy’ubukungu, kwishingikiriza ku myenda, ndetse no gukoresha amakuru mu buryo bwo kuyobya abaturage, ibintu byose bishobora guca intege inzego z’ibihugu no kudindiza iterambere rya Afurika.
Inama yasojwe hasabwa ubumwe n’ubufatanye bwa Afurika. Abayitabiriye bemeranyije ko amahoro n’umutekano birambye muri Afurika bishingira ku nzego zikomeye, ubufatanye bufite icyerekezo, gukorera mu mucyo no kwigira.
Ibiganiro byabaye muri iyo nama ni urubuga rw’ingenzi ku banyeshuri b’abofisiye bakuru, bibafasha kongera ubumenyi n’ubushobozi mu gukemura ibibazo by’umutekano bikomeye Afurika ihanganye na byo.
