Ikipe ya Gasogi United yafashe by’agateganyo umwanya wa mbere ku rutonde rwa shampiyona, nyuma yo gutsinda Bugesera FC igitego 1-0.
Amakipe yombi yari yahuriye mu mukino w’agapingane w’umunsi wa gatatu wa shampiyona wabereye kuri Stade ya Kigali i Nyamirambo.
Byasabye umunota wa 41 w’umukino ngo Max Well Ravel DJOUMEKOU atsindire Gasogi United igitego rukumbi cyayitandukanyije na Bugesera y’Umurundi Ndayiragije Étienne ikomeje kugana ahabi.
Kugeza ubu Gasogi United itaratsindwa umukino n’umwe ni yo yahise iyobora by’agateganyo urutonde rwa shampiyona n’amanota arindwi, nyuma yo guhigika Rayon Sports na Kiyovu Sports zari ziyiri imbere.
Rayon Sports igomba gushaka uko yafata umwanya wa mbere kuri uyu wa Gatatu mu gihe yaba itsinze Rwamagana City FC, mu gihe Kiyovu Sports igomba gutegereza kugeza ku wa Kane ubwo izaba yisobanura na Gorilla FC.
Undi mukino wakinwe kuri uyu wa Kabiri wasize Etincelles FC ibonye intsinzi ya mbere, nyuma yo gutsinda Sunrise FC yari yayisuye kuri Stade Umuganda ibitego 2-1.
