Umugaba Mukuru w’Ingabo z’u Rwanda, Gén. Jean Bosco Kazura, ari i Alger mu gihugu cya Algérie aho yatangiye uruzinduko rw’akazi.
Ni uruzinduko Minisiteri y’Ingabo z’u Rwanda yatangaje ko rugomba kumara iminsi itatu.
Kuri uyu wa Mbere Gén. Kazura yagiranye ibiganiro na mugenzi we uyobora Ingabo za Algérie, Lt Gén Saïd Chengriha, akaba ari ibiganiro byibanze ku bufatanye hagati y’Igisirikare cy’u Rwanda (RDF) na ANPA cya Algérie.
Algérie iri mu bihugu bya Afurika bifite igisirikare gikomeye, ibisobanura ko hari byinshi RDF ishobora kungukira mu bufatanye hagati yayo na ANPA.
Urubuga Global Fire Power rushyira Igisirikare cya Algérie ku mwanya wa gatatu muri Afurika, inyuma y’icya Afurika y’Epfo ndetse n’icya Misiri.
Gén Kazura muri kiriya gihugu cyo mu majyaruguru ya Afurika yaherekejweyo n’Umugaba wungirije w’Ingabo z’u Rwanda zirwanira mu kirere, Col. Godfrey Gasana ndetse na Général de Brigade Patrick Karuretwa usanzwe ari Umuyobozi Mukuru ushinzwe imikoranire mpuzamahanga mu ngabo z’u Rwanda.
