Umugaba Mukuru w’Ingabo za Uganda, Gen. Muhoozi Kainerugaba, yatangaje ko umunyapolitiki Robert Ssentamu Kyagulanyi uzwi nka Bobi Wine atari umunya-Uganda, ko ahubwo ari Umurundi.
Muhoozi usanzwe ari umuhungu wa Perezida Yoweri Kaguta Museveni, yise Kyagulanyi uyoboye abatavuga rumwe n’ubutegetsi bwa se umunyamahanga mu butumwa aheruka kwandika ku rubuga rwe rwa X.
Yagize ati: “Kabobi (nk’uko akunda kwita Bobi Wine) si umunya-Uganda, ni Umurundi.”
Gen. Muhoozi Kainerugaba umaze igihe yigamba ko azata muri yombi Kyagulanyi akamuha isomo, yunzemo ati: “Tuzamwigishiriza uruganda mu ndake.”
Uyu Jenerali si we wa mbere uvuze ko Bobi Wine akomoka mu Burundi, kuko na Frank Gashumba ukuriye abanya-Uganda bafite inkomoko mu Rwanda amaze igihe avuga ko afite ibihamya by’uko uriya munyapolitiki akomoka i Burundi.
Muri 2023 ubwo Gashumba yari kuri Televiziyo ya NBS, yagize ati: “Abantu benshi biyita Abagande ariko bamwe muri bo si bo. Nka Kyagulanyi ndabizi ko afite inkomoko mu Burundi, ndetse akaba ari Umurundi 100%.”
Kugeza ubu Bobi Wine ntabwo arasubiza ku byatangajwe na mukeba we Gen. Muhoozi, gusa uyu munyapolitiki akanaba n’umuhanzi inshuro nyinshi yakunze kuvuga ko akomoka mu bwoko bw’Abaganda.
