Umusore w’imyaka 26 ukomoka muri Ghana, yatawe muri yombi nyuma yo kwiba imodoka y’intambara (igifaru) ya polisi, mu gace ka Nkawie, mu karere ka Atwima Nwabiagya South, mu ntara ya Ashanti.
Uwo musore witwa Ebenezer Frimpong yafashwe nyuma yo gukurikiranwa n’itsinda ryihariye rya SWAT rigizwe n’abapolisi barindwi, rimufatira mu muhanda wa Abuakwa–Kumasi.
Raporo ya Polisi ya Ghana igaragaza ko uriya musore yibye icyo gifaru ahagana saa yine za mu gitondo, ku wa Gatatu tariki ya 15 Mata.
Iyo raporo ivuga ko umushoferi wa polisi, Lance Corporal Joshua Denkyi, wo mu ishami rya Polisi rizwi nka Formed Police Unit (FPU), yari atwaye iyo modoka ifite plaque GP 1131 ayikuye ahitwa Nkawie ayijyanye ku kigo cya polisi gisanira imodoka i Kumasi.
Bivugwa ko uwo mupolisi ageze hafi y’isoko rya Nkawie, yahagaritse imodoka ajya kugura imiti muri farumasi iri hafi, ayisiga iri kwaka. Muri uwo mwanya, Frimpong wari uhanyuze yahise yinjira muri iyo modoka arayitwara, asiga uwo mupolisi atunguwe n’ibibaye.
Uwo mupolisi yahise ahamagara ubutabazi, bituma ubuyobozi bwa polisi mu ntara ya Ashanti butabara vuba. Hahise hoherezwa itsinda ry’abapolisi kabuhariwe (SWAT) riyobowe na Inspector Benjamin Nartey, rigizwe n’abapolisi barindwi, kugira ngo bahagarike iyo modoka yibwe.
Nyuma y’igihe gito, uwo musore yafatiwe hafi y’ahitwa Mim.
Umwe mu bashinzwe umutekano yavuze ko “Ukekwaho icyaha yafashwe nta kibazo kibayeho, kandi imodoka yabonetse itangiritse.”
Inzego zibishinzwe zemeje ko iyo modoka yamaze gusubizwa mu maboko ya polisi.
Kuri ubu, Frimpong aracyafunzwe mu gihe iperereza rikomeje, hagamijwe kumenya neza icyamuteye kwiba imodoka y’urwego rushinzwe umutekano.
