Perezida w’inzibacyuho wa Repubulika ya Guinea, Col. Mamadi Doumbouya yashyizeho Bernard Goumou nka Minisitiri w’intebe w’agateganyo mu gihe Minisitiri w’intebe w’agateganyo wari usanzweho, Mohamed Beavogui, adahari.
Dr. Bernanrd Goumou azakomeza iyi nshingano hamwe n’inshingano ze nka Minisitiri w’ubucuruzi n’inganda nto n’iziciriritse. Iri shyirwaho ryaje kubera ko Minisitiri w’intebe adahari.
Ku wa gatandatu nimugoroba, Mohamed Beavogui abajijwe n’ikinyamakuru cyo muri iki gihugu ” Africa Guinée “, yemeje ko yagiye hanze ya Guinea.
Beavogui ku murongo wa telephone yabwiye itangazamakuru ati “Aka anya mbavugisha, ndi i Roma. Mwumvise Iteka rivuga ko ntahari. Ndabikwemereye rero, ”
Ku rubuga rwe rwa Facebook, Goumou yashimiye perezida w’inzibacyuho muri Guinea kubera izi nshingano yahawe.
Yakomeje agira ati: “Nanyuze kuri uyu muyoboro kugira ngo ntangaze ku mugaragaro ko nashyizwe ku mwanya wa Minisitiri w’intebe, ngo nkwiteho by’agateganyo mu gihe nyakubahwa Mohamed Béavogui adahari… Biragaragara ko ari umurimo utoroshye, urebye ubukuru bw’uyu mugabo, charisma ndetse n’uburyo yagiye ayobora primature kuva yashyirwaho ,”
Igihugu cya Guinea kikaba kiyobowe mu nzibacyuho kuva mu Kwakira umwaka ushize, nyuma y’uko abasirikare barangajwe imbere na Col Doumbouya bahiritse ubutegetsi kuwa 05 Nzeri 2021 bagakuraho Alpha Conde.
