Guverineri wa Kinshasa aravuga ko batangiye gufata abantu bari guhohotera Abatutsi

Muri iyi minsi ishize mu murwa mukuru wa Repubulika ya Demokarasi ya Congo, urubyiruko ruvuga ko ruva mu ihuriro riri ku butegetsi rwagaragaye mu marondo, rufite imihoro mu ntoki, rushaka abantu bavuga Ikinyarwanda, abafashwe bagahohoterwa, kuri uyu wa Kabiri, itariki ya 21 Kamena, Guverineri wa Kinshasa, Gentiny Ngobila, akaba yatangaje ko abapolisi batangiye gufata uru rubyiruko.

Avugana n’umunyamakuru wa RFI i Kinshasa, Pascal Mulegwa, Guverineri Ngobila yagize ati: “Nasabye urwego rushinzwe umutekano kongera ingufu mu kurinda abaturage b’Abatutsi n’umutungo wabo. Twagiye kure dusaba ko hafatwa umuntu wese wakoresheje imvugo zihembera urwango ku banyamahanga zishobora guteza urugomo. Aba bantu hafi ya bose bamaze gutabwa muri yombi, bari mu maboko ya polisi. ”

Ati: “Twafashe icyemezo cyo kubuza kwambara imyenda ya gisirikare ku baturage. Nasabye abapolisi kongera ingufu kugira ngo bafate umuntu wese watinyuka gukora amarondo no gushakisha abaturage b’Abatutsi babayeho mu mahoro hano, mu mujyi wa Kinshasa. Turakomeza kwigisha abantu kugirango bumve. Kinshasa ni umujyi wakira abashyitsi cyane, ku buryo tudashobora kwemera ko abantu badafite umuco baza gutesha agaciro uko kwakira neza abantu kuturanga. ”

Ku rwego rw’igihugu ariko, guverinoma ikomeje gushinja u Rwanda gushyigikira umutwe w’inyeshyamba wa M23, mu gihe yamagana iterabwoba n’ivangura rikorerwa Abanyarwanda n’Abanyekongo bavuga Ikinyarwanda.