Umuyobozi w’impinduramatwara ya Burkina Faso, Thomas Sankara, warashwe mu gihe cyo guhirika ubutegetsi mu 1987, yarashwe byibura n’abicanyi inshuro zirindwi nk’uko impuguke zabitangaje mu rubanza rwe rwategerejwe igihe kirekire.
Ku wa Gatatu, inzobere mu bijyanye no gupima imirambo, Robert Soudre, yabwiye urukiko rwa gisirikare mu murwa mukuru Ouagadougou ko Sankara yarashwe “nibura inshuro zirindwi” mu gituza, isasu rimwe muri yo rikaba ryararasiwe inyuma.
Impuguke ya polisi mu bijyanye no kumenya amasasu yakoreshejwe mu bwicanyi, Komiseri w’ishami, Moussa Millogo, yatangaje ko amasasu Sankara yarashwe ari ya masasu yaka bita “balles traçantes » mu gifaransa, kubera ukuntu imyambaro yari yambaye yahiye nk’uko iyi nkuru dukesha AFP ivuga.
Millogo yavuze ko habonetse ubwoko butandukanye bw’amasasu ku bisigazwa bya Sankara, harimo 7,62 na 9mm. Sankara yari kapiteni mu gisirikare afite imyaka 33 gusa ubwo yageraga ku butegetsi muri coup d’Etat yo mu 1983.
Ku ya 15 Ukwakira 1987, nibwo Sankara na bagenzi be 12 barashwe n’itsinda ry’abasirikare ubwo bari mu nama y’inama y’igihugu ishinzwe impinduramatwara.
Iyicwa ryabo ryahuriranye n’ihirikwa ry’ubutegetsi ryatumye uwari inshuti ye magara, Blaise Compaore afata butegetsi.
Uyu yategetse imyaka 27 mbere yo kuvanwaho mu myigaragambyo y’abaturage mu 2014 ahungira muri Cote d’Ivoire.
Compaore ari kuburanishwa ku iyicwa rya Sankara atagaragara mu rukiko, aho areganwa n’uwahoze ari umugabo we w’iburyo Gen. Gilbert Diendere, icyaha cyo guhungabanya umutekano w’igihugu, ubufatanyacyaha mu bwicanyi, guhisha imirambo no guhohotera abatangabuhamya.
Abagabo 14, harimo na Compaore, nibo baregwa muri uru rubanza rwatangiye ku ya 11 Ukwakira 2021.
Compaore yakomeje guhakana ko ari we watanze amabwiriza yo kwicwa Sankara, mu gihe Diendere nawe ahakana uruhare muri ubwo bwicanyi.
Diendere asanzwe yarakatiwe imyaka 20 y’igifungo kubera uruhare rwe mu mugambi wo guhirika guverinoma y’inzibacyuho yagiyeho nyuma ya Compaore.
